काठमाडौं– मलेसियाले विदेशी कामदार लिन इन्कार गरिरहेको छ । मलेसियाले अन्तर्राष्ट्रिय पर्यटकका लागि नयाँ वर्षदेखि बोर्डर खुला गर्ने निर्णय गरे पनि उसले मलेसियाले विदेशी कामदार लिनेबारे भने निर्णय गर्न सकारात्मक संकेत देखाउन सकेको छैन ।
कोरोना संक्रमण रोकथामका लागि भन्दै लगाएको प्रतिबन्ध खुकुलो बनाउँदै मलेसियाले १ जनवरी २०२२ देखि विदेशी पर्यटकका लागि अन्तर्राष्ट्रिय बोर्डर खुला गर्ने लागेको त्यहाँका स्थानीय सञ्चार माध्यमले जनाएका छन् । कोरोना महामारी रोकथामका लागि लगाइएको प्रतिबन्धका कारण अन्तर्राष्ट्रिय यात्रामा प्रतिबन्ध लगाउँदा पर्यटन क्षेत्रमा ठूलो असर परेको भन्दै मलेसियाले नयाँ वर्ष सुरुसँगै पर्यटकलाई पनि अनुमति दिने भएको समाचारमा जनाइएको छ ।
यस्तै, कोरोना संक्रमण दर घट्दै जाँदा खाडीका देशहरूले पनि कोरोना संक्रमण रोकथामका लागि लगाएको प्रतिबन्ध खुकुलो बनाउँदै लगेको समाचारमा जनाएको छ । महामारीपछि पर्यटकका लागि मलेसियाले आफ्नो बोर्डर खुला गर्ने निर्णय गरे पनि विदेशी कामदार लिनेबारे भने अहिलेसम्म मलेसियाले औपचारिक रूपमा कुनै निर्णय नगरेको त्यहाँ रहेको नेपाली दूताबासले जनाएको छ । पर्यटक क्षेत्र एकदमै सुस्ताएको भन्दै यसलाई अघि बढाउन मलेसियाले विभिन्न मापदण्डसहित पर्यटकका लागि खुला गर्न लागिएको समाचारमा उल्लेख गरिएको छ । मलेसियामा अहिले दैनिक ६ हजारको हाराहारीमा कोरोना संक्रमण पुष्टि हुने गरेको तथ्यांकले देखाएको छ । बुधबार मात्रै मलेसियामा ६ हजार २ सय ४३ जनामा कोरोना संक्रमण पुष्टि भएको तथ्यांक छ । बुधबार ४ हजार १ सय ७९ जना कोरोना संक्रमण मुक्त भएका छन् ।
यसैबीच, युएईले पाँचवर्षे मल्टिपल इन्ट्री टुरिस्ट भिसा जारी गर्ने भएको छ । कोरोना महामारीपछि पर्यटकको संख्या बढाउन र युएईलाई विश्वको मुख्य पर्यटक गन्तव्यको रूपमा स्थापित गर्ने भन्दै भिसा प्रणाली सहज बनाउन लागेको समाचारमा जनाइएको छ । ५ वर्षको मल्टिपल टुरिस्ट भिसाअन्तर्गत पर्यटकहरू पटक–पटक युएई आउजाउ गर्न सक्नेछन् । यो व्यवस्थाबाट पर्यटकले पटक–पटक भिसा लगाउने झन्झट गर्न नपर्ने भएको छ । पर्यटक भिसामा एकपटक जाँदा ९० दिनसम्म बस्न पाइने छ भने थप ९० दिन आफ्नो बसाइँ लम्ब्याउन सकिने बताइएको छ । यो भिसा संसारका सबै देशका नागरिकले पाउने समाचारमा उल्लेख गरिएको छ ।
