काठमाडौं– कतार भिसा सेन्टर (क्युभिसी) मा सेटिङका आधारमा काम भइरहेको पाइएको छ । एक महिना पछिका लागि समय तोकेर गरिनुपर्ने क्युभिसीको काम बुधबार १० बजेका लागि सेटिङ गरेर सेवा दिइएको नेपाल वैदेशिक रोजगार व्यवसायी संघका महासचिव सुजितकुमार श्रेष्ठले बताएका छन् ।
एक महिनामा पाउनु पर्ने समय क्युभिसीको फटाइका कारण बुधबार १० बजे खुलेको भन्ने जानकारी पाएपछि मिडियाको टोलीसहित पुगेपछि सेटिङ हुन्छ भन्ने आरोप पुष्टि भएको उनले बताए । ‘कुनै व्यावसायीले बिहान सेटिङमा काम भइरहेको सूचना दिएको र सोहीअनुसार त्यहाँ जाँदा डेढ दुई सय जना लाइनमा बसेको पाइयो,’ महासचिव श्रेष्ठले भने । यस विषयमा प्रश्न गर्दा क्युभिसीका म्यानेजिङ डाइरेक्टर प्रताप गुरुङले कुनै पनि प्रतिक्रिया दिन नमानेको महासचिव श्रेष्ठले बताए ।
व्यवसायीहरूले लामो समयदेखि क्युभिसीले दुःख दिने गरेको गुनासो गर्दै आएको र आज त्यो पुष्टि भएको महासचिव श्रेष्ठले दाबी गरेका छन् । क्युभिसीलाई बारम्बार सहज तरिकाले सेवा प्रदान गर्न आग्रह गर्दै आएको भए पनि पैसा कमाउनेतर्फ लागेको उनको आरोप छ । क्युभिसी खुल्ने समयका बारेमा व्यावसायीहरूलाई जानकारी नहुने र केही सिमित व्यक्तिको सेटिङका आधारमा हुने गरेको भन्दै संघले यसअघि आन्दोलन गर्नेसम्मको चेतावानीसमेत दिएको थियो । क्युभिसीलाई दैनिक ७ सय जनाका लागि स्वास्थ्य परीक्षण गर्न आग्रह गर्दै आए पनि त्यसको सुनुवाइ हुन नसकेको महासचिव श्रेष्ठले बताए ।
