काठमाडौं– नेपालीहरूको आकर्षक श्रम गन्तव्य मुलुक दक्षिण कोरियाले विदेशी श्रमिकका लागि लैजाने नीति खुकुलो बनाएको छ । त्यहाँ श्रमिकको अभाव भएपछि विदेशी श्रमिक आउन दिने नीतिलाई खुकुलो बनाउने तयारी गरेको हो ।
कृषि, निर्माणलगायत धेरै विदेशी श्रमिक काम गर्ने क्षेत्रहरूमा हाल श्रमिकको चर्को अभाव रहेको र त्यसका लागि सरकारले नीति नै परिवर्तन गर्न लागेको स्थानीय सञ्चार माध्यमले जनाएका छन् । कोभिड–१९ को कारण झन्डै २ वर्षदेखि गैरव्यवसायिक कामका लागि भिसा दिन रोकिएको र दक्षिण कोरियामा श्रमिकको चर्को अभाव हुन पुगेको समाचारमा जनाइएको छ । समाचारमा जनाइएअनुसार दक्षिण कोरियाको श्रम मन्त्रालयले ई ९ भिसा जारी गर्ने जानकारी दिएको छ जुन गैरव्यवसायिक कामका लागि प्रदान गरिन्छ । ई ९ मुख्य गरी नेपालसहित १६ वटा मुुलुकबाट शारीरिक परिश्रम बढी पर्ने प्रकृतिको रोजगारीका लागि आउने नागरिकहरूका लागि जारी गरिने भिसा हो । कोभिड–१९ को महामारी सुरु भएपछि यस्तो भिसा जारी गर्न पूर्ण रूपमा रोकिएको थियो ।
श्रमिकको अभाव सुरु भएपछि दक्षिण कोरियाले गत वर्ष नै एउटा मुलुकका लागि बन्देज हटाएको थियो भने यस वर्षको अप्रिलबाट ५ वटा मुलुकका लागि बन्देज हटाएको थियो । नेपालबाट पनि गत हप्तादेखि कोरियाले श्रमिक लैजान सुरु गरेको छ । पहिलो चरणमा प्रतिवद्ध श्रमिक लैजान सुरु भएको र ४८ जना कोरिया पुगेको इपिएस कोरिया शाखाका निर्देशक सुरेश रावतले बताएका छन् । पहिलो चरणमा कोरियाले १ सय १९ जना ‘प्रतिवद्ध श्रमिक’ नेपालबाट लिने गरी निर्णय गरेअनुसार उनीहरू कोरिया गएको निर्देशक रावतले बताए ।
दक्षिण कोरिया जाने प्रक्रिया पूरा गरेर बसेका झन्डै ८ हजार नेपाली कोभिड महामारीका कारण कोरिया जान पाएका छैनन् । दक्षिण कोरियाले कोभिड–१९ सँगै बाचौ’ भन्ने नीति लिएपछि सोहीअनुरूपको योजना श्रम मन्त्रालयले यहि नोभेम्बरमा सार्वजनिक गर्ने अपेक्षा गरिएको समाचारमा जनाइएको छ ।
-1745656903.jpeg)