काठमाडौं– नेपालबाट रोजगारीका लागि विदेशीने श्रमिकमध्ये आधाभन्दा धेरै अदक्ष श्रमिक रहेको तथ्यांकले देखाएको छ । चालू आर्थिक वर्षको असोज महिनामा रोजगारीका लागि विदेश गएका ३९ हजार ६ सय ७१ जनामध्ये आधाभन्दा बढी अर्थात २२ हजार ५ सय ५० जना नेपाली अदक्ष रहेको वैदेशिक रोजगार विभागको तथ्यांकले देखाएको हो । यो संख्या विदेश गएकाहरूको ५६.८४ प्रतिशत हुन आउँछ ।
भदौ महिनामा विदेश जाने यस्तो संख्या ५४.६८ प्रतिशत रहेको थियो । अघिल्लो महिना नेपालबाट विदेश गएका ३६ हजार ४० जनामध्ये १९ हजार ७ सय ९ जना अदक्ष श्रमिक विदेशिएको विभागको तथ्यांकले देखाएको छ । यो प्रतिशत असोज महिनामा झन् बढेको देखिएको हो । त्यस्तै असोज महिनामा नेपालबाट उच्च दक्षता भएका जम्मा ११ जना श्रमिक विदेश गएको तथ्यांकले देखाएको छ । जुन जम्मा विदेश गएकाहरूको ०.०२ प्रतिशत हो । यो संख्या भदौ महिनामा जम्मा ८ जना रहेको थियो । त्यस्तै जाने श्रमिकमध्ये पेसाविद् (प्रोफेसनल) जम्मा २३ जना विदेश गएको देखिएको छ । यो असोज महिनामा विदेश गएका जम्मा नेपालीको ०.०५ प्रतिशत मात्रै हो । यो संख्या अघिल्लो महिना ०.०७ प्रतिशत अर्थँत २७ जना रहेको थियो ।
असोज महिनामा नेपालबाट ३ हजार ५१ जना अर्थदक्ष श्रमिक विदेश गएका छन् । जसले जम्मा संख्याको ७.६९ प्रतिशत हिस्सा ओगटेको छ । यस्तो संख्या भदौ महिनामा ७.४१ प्रतिशत रहेको थियो । त्यस्तै नेपालबाट दक्ष श्रमिक १४ हजार ३६ जना विदेश गएका छन् । यो जम्मा विदेश गएकाको ३५.३८ प्रतिशत हो । विभागको तथ्यांकअनुसार आर्थिक वर्ष ०७७÷७८ मा १ लाख ६६ हजार ६ सय ९९ जना वैदेशिक रोजगारीमा गएकोमा उच्च दक्षता भएका जम्मा ६१ जना वैदेशिक रोजगारीमा गएका थिए । यो गत आर्थिक वर्षमा विदेश गएकामध्ये ०.०३ प्रतिशत हो । त्यस्तै पेशाविद् (प्रोफेसनल) श्रमिक जम्मा २ सय ४६ जना गएका थिए । यो ०.१४ प्रतिशत हो । गत वर्ष पनि सबैभन्दा बढी अदक्ष श्रमिक नेपालबाट विदेशिएको तथ्यांकले देखाएको छ । ८० हजार ३ सय ८२ जना अदक्ष श्रमिक विदेशिएको विभागको तथ्यांकले देखाएको छ । यो संख्या ४८.२१ प्रतिशत हो ।
नेपालबाट सीप सिकेका श्रमिक न्यून मात्रामा वैदेशिक रोजगारीका लागि गइरहेको भन्दै सरकारले दक्ष बनाएर पठाउने लक्ष्य लिएको श्रम रोजगार तथा सामाजिक सुरक्षा मन्त्री कृष्णकुमार श्रेष्ठले बताएका छन् । मन्त्री श्रेष्ठले भने ‘प्राविधिक शिक्षा र व्यावसायिक प्रशिक्षण परिषद् (सिटिइभिटी) सँग समन्वय गरी सीपमूलक तालिम सिकाएर दक्ष श्रमिक विदेश पठाउने विषयमा पहल भइरहेको छ ।’ संख्यात्मकभन्दा पनि गुणात्मक श्रमिक पठाउनेतर्फ आफ्नो ध्यान केन्द्रित भएको मन्त्री श्रेष्ठले बताए ।
युएईसँग नेपालबाट अदक्ष श्रमिक मात्रै नभएर दक्ष श्रमिक पनि लैजान पहल गरिएको उनले बताएका छन् । सीप सिकेका श्रमिक पठाउँदा थोरै गए पनि रेमिट्यान्स बढी भित्रिने भएकाले त्यसतर्फ लाग्नु पर्ने मन्त्री श्रेष्ठले बताए । वैदेशिक रोजगारीको क्षेत्रलाई सम्मान गर्ने पेसाका रूपमा स्थापित गर्नका लागि आपूmले कुनै कसर बाँकी नराख्ने उनको भनाइ थियो । चालू आर्थिक वर्षको तीन महिनामा नेपालबाट १ लाख १ हजार १ सय ३९ जना नेपाली रोजगारीका लागि विदेश गएको विभागको तथ्यांकले देखाएको छ । अघिल्लो आर्थिक वर्षको धेरै समय लकडाउन भएकाले विदेशिनेको संख्यामा निकै कमी आएको सरोकारवालाले जनाएका छन् । चालू आर्थिक वर्षको सुरुदेखि नै महामारीको अवस्थामा कमी आएको र अहिलेसम्मको अवस्था हेर्दा वैदेशिक रोजगारीको क्षत्र सन्तोषजनक रहेको व्यवसायीहरूको भनाइ रहेको छ ।
-1752335779.jpg)
