काठमाडौ– आबुधाबी डायलग नेपालका लागि उपलब्धिमूलक रहेको श्रम रोजगार तथा सामाजिक सुरक्षा मन्त्रालयले जनाएको छ । मन्त्रालका प्रवक्ता डुण्डुराज घिमिरेद्वारा जारी गरिएको विज्ञप्तिमा मन्त्रीसहितको प्रतिनिधिमण्डलको भ्रमण उपलब्धिमूलक रहेको बताइएको हो ।
नेपालको प्रतिनिधिमण्डलले श्रमिकका विभिन्न समस्याका विषयमा यस फोरममा आवाज उठाएको र स्वच्छरूपमा श्रमिक भर्ना प्रक्रिया सुनिश्चित गर्न श्रमिक पठाउने र प्राप्त गर्ने मुलुकबीच सहकार्य गर्ने तथा श्रमिकको पारिश्रमिकलगायतका विषयमा नेपालले आफ्नो धारण राखेको विज्ञप्तिमा उल्लेख गरिएको छ । यहि २५ देखि २९ अक्टोबरसम्म भएको डायलगमा नेपालका श्रम रोजगार तथा सामाजिक सुरक्षामन्त्री कृष्णकुमार श्रेष्ठ, सचिव सूर्यप्रसाद गौतम र उपसचिव थानेश्वर भुसाल सहभागी भएको विज्ञप्तिमा उल्लेख गरिएको छ । बैठकको एजेण्डा तय गर्न बसेको वरिष्ठ अधिकारीहरूको बैठकमा नेपालका श्रम सचिव गौतम सहभागी भएको र त्यसमा कोभिड–१९ का कारण आप्रवासी श्रमिकहरूले भोगेका समस्याहरूको समाधान गर्न सहभागी देशका प्रतिनिधिहरूलाई आग्रह गरेको मन्त्रालयका प्रवक्ता घिमिरेले बताएका छन् ।
कार्यक्रममा मन्त्री श्रेष्ठले विभिन्न पाँचवटा विषयमा नेपालको तर्फबाट धारणा व्यक्त गरेको विज्ञप्तिमा जनाइएको छ । जसमा वैदेशिक रोजगारीमा गई स्वदेश फर्केका श्रमिकहरूलाई स्वदेशमा नै पुनःएकीकरण गर्न सहयोग गर्ने, स्वच्छरूपमा श्रमिक भर्ना प्रकृया सुनिश्चित गर्न श्रमिक पठाउने मुलुक र प्राप्त गर्ने मुलुकबीच सहकार्य गर्ने, आप्रवासी श्रमिकहरूको कार्यस्थलको सुरक्षा सुनिश्चित गर्नेलगायतका विषयमा आवाज उठाएको जनाइएको छ । त्यस्तै आप्रवासी श्रमिकले सिकेको सीपको पहिचान गरी उनीहरूलाई उपयुक्त काममा लगाउने र श्रमिकको न्यूनतम पारिश्रमिक बढाउने विषयमा ध्यान दिनु पर्ने धारणा राखेको विज्ञप्तिमा जनाइएको छ ।
यो भ्रमणको अवसरमा त्यहाँ रहेका नेपाली श्रमिकसँग समेत मन्त्री श्रेष्ठले छलफल गरेको बताइएको छ । त्यस्तै मन्त्री श्रेष्ठले संयुक्त अरब इमिरेट्स (युएई) का मानव संशाधन तथा इमिरिटाइजेशन मन्त्रीसँग छलफल गर्दै द्विपक्षीय श्रम सम्बन्धमा विविध विषयहरूमा छलफल गरेको समेत जनाइएको छ ।
-1745656903.jpeg)