काठमाडौं– नेपाल सरकारले जोर्डनको रोजगारी खुलाउने संकेत गरेको छ । सरकारले रोजगारीका लागि जोर्डन जान चाहने नेपालीहरूका लागि मागपत्र प्रमाणीकरण खोल्ने निर्णय गरेको हो । मन्त्रीस्तरीय निर्णय गर्दै केही समयदेखि रोकिएको जोर्डन रोजगारी खुल्ला बनाउने निर्णय भएको बताइएको छ ।
मन्त्री स्तरीय निर्णयअुनसार जोर्डनको गार्मेन्ट क्षेत्रमा नेपाली श्रमिक पठाउने प्रक्रिया अगाडि बढाइएको हो । परराष्ट्र मन्त्रालयले शुक्रबार जोर्डनसमेत हेर्ने इजिप्टको कायरोमा रहेको नेपाली दूतावासलाई मागपत्र प्रमाणीकरणको प्रक्रिया अगाडि बढाउन निर्देशन दिएको छ । परराष्ट्र मन्त्रालयले श्रमिकले प्रत्यक महिना ३ सय अमेरिकी डलरभन्दा कम तलब नहुने रोजगारदाता कम्पनीको ग्यारेन्टी भएमा मागपत्र प्रमाणीकरण गर्न निर्देशन दिएको हो ।
कायरोमा रहेको दूतावासबाट मागपत्र प्रमाणीकरणको निर्णय भएको जानकारी परराष्ट्रले श्रम, रोजगार तथा सामाजिक सुरक्षा मन्त्रालयलाई पठाइसकेको बताइएको छ । यसअघि श्रम स्वीकृति लिई जोर्डन गएका र हाल त्यहाँ कार्यरत नेपालीले श्रमिकले प्रतिमहिना तलब तथा अन्य सुविधासहित मासिक ३ सय अमेरिकी डलरभन्दा बढी पारिश्रमिक पाउने गरेको बताइएको छ ।
जोर्डनमा कार्यरत केही नेपाली श्रमिकले सरकारले तोकेको न्यूनतम् पारिश्रमिकसमेत नपाएको भन्दै कायरोमा रहेको दूतावासले मागपत्र प्रमाणीकरण गर्न छाडेको थियो । मागपत्र प्रमाणीकरण रोकिँदा श्रम मन्त्रालयअन्तर्गतको सुरक्षित आप्रवासन केन्द्रबाट तालिम लिएका नेपाली जोर्डन जानबाट वञ्चित बनेका बताइएको छ । श्रम मन्त्रालयले जोर्डनमा नेपाली श्रमिकको माग बढेको, श्रमिक भर्ना प्रक्रिया मर्यादित रहेको र जोर्डन नेपाली श्रमिकका लागि सुरक्षित गन्तव्यका रूपमा रहेकाले मागपत्र प्रमाणीकरण गर्ने निर्णय कार्यान्वयन गर्न परराष्ट्र मन्त्रालयलाई पत्रसमेत लेखेको बताइएको छ ।
