काठमाडौं– अफगानिस्तानमा रहेका थप ३२ जना नेपालीको उद्धार गरिएको छ । अफगानिस्तानबाट ३२ जनालाई युएई हुँदै नेपाल ल्याइएको र यो सँगै अफगानिस्तानबाट हालसम्म ९ सय ४० जनाको उद्धार गरिएको परराष्ट्र मन्त्रालयले जनाएको छ ।
उद्धार गरिएका ३२ जना शनिबार नेपाल आइपुगेको बताइएको छ । शनिबार स्वदेश फर्किएकाहरू श्रम स्वीकृति नलिएर अनौपचारिक रूपबाट नै रोजगारीका लागि अफगानिस्तान गएका मन्त्रालयले जनाएको छ । राजधानी काबुलसहित विभिन्न ठाउँमा छरिएर बसेका उनीहरूलाई एकै स्थानमा जम्मा पारेर शनिबार काठमाडांै ल्याइएको हो । अब संयुक्त राष्ट्रसंघअन्तर्गत विभिन्न निकायमा काम गर्ने केही नेपाली मात्रै अफगानिस्तानमा रहेको मन्त्रालयले जनाएको छ ।
संयुक्त राष्ट्रसंघका निकायले अफगानिस्तानमा रहेका नेपालीलाई कुनै खतरा नरहेको जानकारी दिँदै कुनै जोखिम भएमा तत्कालै फर्काइने जानकारी दिएको पनि परराष्ट्र मन्त्रालयले जारी गरेको विज्ञप्तिमा जनाइएको छ । परराष्ट्र मन्त्रालयले अब कुनै पनि नेपाली अफगानिस्तानमा उद्धारको पर्खाइमा नरहेको जनाएको छ । तालिबानले अफगानिस्तान कब्जा गर्ने तयारी गर्नासाथ संयुक्त राष्ट्रसंघ, अमेरिका, बेलायत, क्यानडा, जापान, विभिन्न रोजगारदाता कम्पनीलगायतको सहयोगमा नेपालीलाई उद्धार गर्न सहज भएको जनाएको छ ।
-1745656903.jpeg)