काठमाडौं– वैदेशिक रोजगार व्यवसायीहरूको छाता संगठन नेपाल वैदेशिक रोजगार व्यवसायी संघको चुनावी कमिटीका विषयमा तिहारपछि निर्णय हुने भएको छ । संघको चुनाव आगामी मंसिर २७ गते हुने र त्यसका लागि तिहारपछि चुनावी कमिटी निर्माण हुने संघका सचिव मेघनाथ भुर्तेलले बताए ।
बैठक बसेर निर्वाचन कमिटी निर्माण हुने र चुनावको तयारी पनि त्यसपछि नै हुने उनले बताएका छन् । कोरोना–१९ महामारीका कारण संघको चुनावको मिति केही समय पछि धकेलिएको बताइएको छ । संघको चुनाव ७ असोज ०७६ सालमा भएको थियो । सो चुनावमा विष्णुप्रसाद गैर अध्यक्ष निर्वाचित भएका थिए । दुई वर्षको कार्यकाल हुने संघको चुनाव गर्नका लागि जिल्ला प्रशासन कार्यालयले पनि अनुमति दिइसकेको अवस्थामा समय अपुग भएका कारण चुनावको मिति पछि सरेको सचिव भुर्तेलले बताएका छन् ।
पछिल्लो समय कोरोनाको महामारी पनि कम हुँदै गएको र चाडबाड पनि सकिएपछि संघको चुनाव गर्न सहज हुने उनले बताए । संघका अध्यक्ष गैरेको ३० वैशाखमा कोरोनाका कारण निधन भएपछि अहिले संघको कार्यवाहक अध्यक्षको जिम्मेवारीमा कमल तामाङ रहेका छन् ।
