काठमाडौं– गैरआवासीय नेपाली संघ (एनआरएनए) को राष्ट्रिय समन्वय परिषद्हरूको विश्व भेलामा सहभागीहरूले एनआरएनए विधानसम्मत रूपमा चल्नु पर्ने बताएका छन् । ‘गैरआवासीय नेपाली संघमा एकताः आजको आवश्यकता’ भन्ने मुल नाराका साथ सुरु भएको भेलामा सहभागीहरूले संघमा समस्या देखिएको भन्दै विधानमा भएको व्यवस्थाअनुसार अघि बढ्न माग गरेका हुन् ।
भेलालाई सम्बोधन गर्दै नेपाली कांग्रेसका सहमहामन्त्री तथा पूर्वपरराष्ट्रमन्त्री डा. प्रकाशशरण महतले विधि विधानसम्मत रूपमा संस्थामा देखिएका समस्या समाधान गर्नु पर्ने बताएका छन् । विदेशमा बस्ने सबै नेपालीको साझा संस्थाले सबै नेपालीलाई जोडेर अगाडि बढ्नु पर्ने उनले बताए । यतिबेला सम्मेलन हुने गरेको तर योपटक नहुँदा अभावको महसुस गरिएको उनले सुनाए ।
त्यस्तै कार्यक्रममा बोल्दै एकीकृत नेकपा माओवादी केन्द्रका प्रवास समन्वय कमिटीका संयोजक ओम शर्माले राष्ट्रिय समन्वय परिषद्ले अन्तर्राष्ट्रिय समन्वय परिषद्लाई सकारात्मक सुझाव दिनुपर्ने बताएका छन् । एनआरएनएको ज्ञान, सीप राष्ट्र विकासका लागि लगाउनु पर्ने उनले बताए । संघबाट नेपालका राजनीतिक दलले सिक्नु पर्ने भन्दै यस अहिले देखिएको समस्या समाधान छलफल गरेर टुंग्याउनु पर्ने बताए ।
त्यस्तै नेकपा एकीकृत समाजवादी पार्टीका प्रवास इन्चार्ज श्रीप्रसाद साहले राजनीतिक प्रभाव देखिन नहुने बताएका छन् । संघको विधि र विधानमा रहेर समस्या समाधान गर्नु पर्ने भन्दै संघको सम्मेलन गर्नका लागि समस्या समाधान गरी अगाडि बढ्नु पर्ने धारणा व्यक्त गरे । सामाजिक संस्था भएकाले सामाजिक रूपमै अगाडि बढ्न सक्नु पर्ने उनको भनाइ थियो । त्यस्तै संघका संरक्षक देवचन हिराचनले अहिले देखिएको अवस्था आउन नहुने भन्दै यसलाई समाधान गर्नका लागि छलफल गरी टुंग्याउन पर्ने बताएका छन् । समस्या समाधान गर्न नसके संस्था जोखिममा पर्ने भन्दै यसतर्फ ध्यान दिनु पर्ने उनले बताए । जटिल अवस्था देखिँदा पनि समस्या छैन भन्ने कुरा सुनिनु दुःखद् भएको भन्दै अहिलेको समस्या समाधान गर्नेतर्फ सबै लाग्नु पर्ने उनले बताए ।
त्यस्तै नेपाली कांग्रेसको जनसम्पर्क समितिका प्रमुख गोविन्द भट्टराइले संस्थाको उद्देश्यअनुसार काम गर्न सक्नु पर्ने बताएका छन् । संस्था नेपालीहरूको दुःखको साथीका रूपमा काम गरिरहेको भन्दै यस भित्रका समस्या समाधान गर्नेतर्फ सबै लाग्नु पर्ने उनले बताए । छिटोभन्दा छिटो सम्मेलन गरी संस्थाको अस्तित्व जोगाउनु पर्ने उनको भनाइ थियो । यता संघका महिला संयोजक भुमादेवी लिम्बूले एनसिसी र आइसिसी मिलेर समस्या समाधान गरी उत्कृष्ट संस्था बनाउनु पर्ने बताएकी छन् । त्यस्तै संघका सचिव राजेन्द्रकुमार (आर.के.) शर्माले एनसिसी र आइसिसीबीच मुटु र रगतको सम्बन्ध रहेको भन्दै सबै मिलेर समस्या समाधान गर्नु पर्ने बताएका छन् ।
संघका सल्लाकार तथा अध्यक्षको उम्मेदवार कुल आचार्यले धेरैले पसिना बगाएर बनाएको संस्थालाई व्यक्तिगत स्वार्थमा प्रयोग गर्न दिनु नहुने बताएका छन् । विश्व भेला सम्मेलन हुनु पर्ने समयमा समस्या समाधानका लागि एनसिसी भेला हुनु निकै दुःखद् कुरा भएको उनले बताए । अहिले देखिएका समस्याले संस्थालाई कमजोर बनाउने भन्दै यस्ता गतिविधि हुन नहुने उनले बताएका छन् ।
-1752335779.jpg)
