काठमाडौं– कतार सरकारले विदेशी श्रमिकलाई पनि स्वास्थ्य बिमा अनिवार्य गरेको छ । त्यहाँको जनस्वास्थ्य मन्त्रँलयले स्वास्थ्य बिमाका सम्बन्धमा नयाँ व्यवस्थाबारे प्रष्ट्याउँदै विदेशी श्रमिकलाई पनि कानुन नम्बर (२२), २०२१ का विषयमा प्रष्ट पारेको हो ।
कतारका शेख तामिम विन हमाद अल थानीले सो नयाँ कानुन जारी गरेको र त्यसमा भएको व्यवस्थाअनुसार अब रोजगारीका लागि कतार पुगेका विदेशी श्रमिकले पनि यो व्यवस्था अनुसार स्वास्थ्य बिमा गर्नु पर्ने भएको स्थानीय सञ्चार माध्यमले जनाएका छन् । सो कानुन सरकारी गजेटमा प्रकाशित भएको ६ महिनापश्चात लागू हुने बताइएको छ र बुधबार सो कानुन जारी भएको बताइएको छ ।
नयाँ कानुन अनुसार कतारमा कार्यरत सम्पूर्ण विदेशी श्रमिक तथा पर्यटक भिसामा आउनेहरूले समेत स्वास्थ्य बिमा अनिवार्य गर्नु पर्ने छ । सो बिमाअन्तर्गत आधारभूत स्वास्थ्य सेवा प्राप्त हुने पनि जनाइएको छ । नयाँ कानुनले रोजगारदातालाई उनीहरूसँग काम गर्ने श्रमिकहरूको बिमा गर्नुपर्ने व्यवस्था गरेको छ ।
ती श्रमिकहरू बिमा कम्पनीमार्फत जनस्वास्थ्य मन्त्रालयमा दर्ता हुनु पर्ने बताइएको छ । बिमामा दर्ता भएको ६ महिनापछि बिमा कार्यान्वयनमा आउने समाचारमा जनाइएको छ । यसका बारेमा निकट भविष्यमा नै मन्त्रालयले थप जानकारी दिने जनाइएको छ ।
-1752335779.jpg)
