काठमाडौं– भदौ महिनामा नेपालको सबैभन्दा बढी धनुषा जिल्लाबाट ३ हजार २ सय ७१ जना र सबैभन्दा कम मनाङबाट जम्मा २ जना वैदेशिक रोजगारीमा गएका छन् । वैदेशिक रोजगार विभागको तथ्यांकअनुसार चालू आर्थिक वर्षको दोस्रो महिनामा भदौमा नेपालबाट विदेश गएका ३६ हजार ४० जनामध्ये धनुषाका ३ हजार २ सय ७१ जना र मनाङबाट २ जना मात्रै विदेशिएका हुन् ।
विदेशिने युवाको आँकडाको पहिलो नम्बरमा धनुषा रहँदा दोस्रो नम्बरमा सिराह रहेको छ । सिराहबाट भदौ महिनामा २ हजार २ सय ८२ जना विदेशिएका छन् । जसमध्ये १ हजार ६ सय ६५ जना नयाँ र अन्य पुनः श्रमस्वीकृति लिएर जाने रहेको विभागको तथ्यांकले देखाएको छ । सबैभन्दा बढी विदेशिएको धनुषाबाट नयाँ २ हजार ५ सय १७ जना रहेका छन् । भदौ महिनामा धेरै विदेशी जानेको तेस्रो नम्बरमा महोत्तरी रहेको छ । यहाँबाट पनि एक महिनाको अवधिमा २ हजारभन्दा बढी विदेशिएका छन् । एक महिनाको अवधिमा १ हजार ५ सय ८४ जना नयाँसहित २ हजार १ सय १६ जना महोत्तरीबाट विदेश गएका हुन् ।
त्यस्तै सर्लाहीबाट पनि भदौ महिनामा १ हजार ३ सय ३४ जना विदेश गएको तथ्यांकले देखाएको छ । जसमा १ हजार ५० जना नयाँ श्रम स्वीकृति लिएर र बाँकी पुनः श्रम स्वीकृति लिएर जाने रहेको देखिएको छ । त्यस्तै झापाबाट पनि यो एक महिनाको अवधिमा १ हजार ३ सय २२ जना विदेश गाएका छन् । त्यसमध्ये नयाँ ७ सय ५१ जना रहेको देखिएको छ । यता सुनसरीबाट पनि एक महिनाको अवधिमा एक हजारभन्दा बढी युवा विदेशिएका छन् । यहाँबाट एक महिनाको अवधिमा १ हजार २ सय ७३ जना विदेश गएको विभागको तथ्यांकले देखाएको छ । विदेश गएकामध्ये आधाभन्दा बढी नयाँ रहेका छन् । सुनसरीबाट विदेश जानका लागि नयाँ ७ सय ६४ जनाले श्रम स्वीकृति लिएको देखिएको छ ।
त्यस्तै एक महिनाको अवधिमा नयाँ र पुराना गरी मोरङबाट १ हजार २ सय ३४ जनाले श्रम स्वीकृति लिएका छन् । जसमा नयाँ ७ सय ५३ र बाँकी पुनः श्रम स्वीकृति लिने रहेको विभागको तथ्यांकमा उल्लेख गरिएको छ । भदौ महिनामा सप्तरीबाट पनि एक हजारभन्दा बढी व्यक्ति विदेश जानका लागि श्रम स्वीकृति लिएको तथ्यांकले देखाएको छ । सप्तरीबाट १ जहार २ सय २५ जनाले श्रम स्वीकृति लिएको देखिएको छ । जसमा ८ सय ७९ जना नयाँ रहेका छन् ।
यसैगरी, भदौ महिनामा मनाङबाट सबैभन्दा कम २ जनाले श्रम स्वीकृति लिएका छन् । जसमा एक जना पुनः र एक जना नयाँ श्रम स्वीकृति लिने रहेको देखिएको छ । त्यस्तै मुगु र डोल्पाबाट ५–५ जना विदेशिएका छन् । यता हुम्लाबाट ६ जना, मुस्ताङबाट १० जना र बझाँङबाट १३ जनाले श्रम स्वीकृति लिएका छन् । त्यस्तै बाजुरा र कालीकोटबाट १५–१५ जनाले श्रम स्वीकृति लिएको विभागको तथ्यांकले देखाएको छ । भदौ महिनामा नेपालबाट ३६ हजार ४० जनाले श्रम स्वीकृति लिएको विभागले जनाएको छ । जसमा नयाँ २४ हजार ६ सय ९२ र पुनः श्रम स्वीकृति लिने ११ हजार ३ सय ४८ जना रहेको तथ्यांकले देखाएको छ ।
आधा श्रमिक अदक्ष
भदौ महिनामा विदेश गएका नेपालीमध्ये आधाभन्दा बढी अदक्ष श्रमिक रहेका छन् । विभागको तथ्यांकअनुसार भदौ महिनामा विदेश गएकामध्ये ५४.६८ प्रतिशत अदक्ष श्रमिक रहका छन् । ३६ हजार ४० जना मध्ये १९ हजार ७ सय ९ जना अदक्ष श्रमिक रहेको देखिएको छ । गत आर्थिक वर्ष ०७७÷७८ मा विदेश गएकामध्ये ४८.२२ प्रतिशत अदक्ष श्रमिक रहेका थिए । भदौ महिनामा केही न केही न केही सीप भएर विदेश जानेको संख्या १३ हजार ६ सय २५ जना रहेको छ । जुन ३७.८० प्रतिशत हुन आउँछ । यो प्रतिशत गत आर्थिक वर्षमा ४२.२४ प्रतिशत रहेको थियो । त्यस्तै अर्धसीप भएर विदेशिनेको संख्या २ हजार ७ सय ७१ जना रहेको छ । जुन ७.४१ प्रतिशत हो । यस्तो संख्या गत आर्थिक वर्षमा ९.३४ प्रतिशत रहेको थियो ।
त्यस्तै नेपालबाट भदौ महिनामा विदेश गएकामध्ये व्यवसायिक श्रमिकको संख्या ०.०७ प्रतिशत मात्रै रहेको छ । यस्तो सीप भएका जम्मा २७ जना नेपाली विदेश गएका छन् । यो संख्या गत आर्थिक वर्षमा ०.१४ प्रतिशत रहेको थियो । नेपालबाट विदेश जानेमध्ये उच्च सीप भएका श्रमिकको संख्या न्यून रहेको विभिन्न अध्ययनहरुले देखाएको छ । भदौ महिनामा ०.०२ प्रतिशत अर्थात ८ जना उच्च दक्षता भएका नेपाली विदेशमा रोजगारीका लागि गएका छन् । यस्तो संख्या गत आर्थिक वर्षमा ०.०३६ प्रतिशत रहेको थियो ।
