काठमाडौं– इजरायल रोजगारीका लागि सञ्चालन गरिएको परीक्षाबाट एक हजार ६ सय जनाको अन्तिम नाम सार्वजनिक गरिएको छ । २८ भदौमा सञ्चालन भएको लिखित परीक्षाको सम्पूर्ण प्रक्रिया पूरा गरे अन्तर्वार्ताबाट उनीहरू छनोट भएको वैदेशिक रोजगार विभागले जनाएको छ ।
इजरायलमा दीर्घकालीन स्याहार केन्द्र (केयर गिभर) मा जान भाषा परीक्षा पास गरेकाहरू मध्येबाट १ हजार ६ सय जनाको नामा अन्तिम चरणका लागि सिफारिस गरेर इजरायली दूताबासमा पठाइएको बताइएको छ । विभागले ४ असोजदेखि ९ गतेसम्म लिएको अन्तर्वार्ताबाट उनीहरू छनोट भएको बताइएको छ । सुरुमा १ हजार ४ सय जनाको नाम रोस्टरमा पठाउने भनिए पनि इजरायली दूतावासले परराष्ट्र मन्त्रालयमार्फत अनुरोध गरेका कारण संख्या केही बढी रोस्टरमा पठाइएको विभागका निर्देशक तथा इजरायल शाखा प्रमुख डम्बरबहादुर सुनुवारले बताएका छन् । अहिलेसम्मको अवस्थामा १ हजार जान मात्रै लैजाने कुरा नै भए पनि इजरायलले अनौपचारीक रूपमा केही अरु श्रमिक पनि लैजाने सम्भावनालाई मध्यनजर गरेर १ हजार ६ सयको नाम रोस्टरमा पठाइएको उनले बताए । नेपाल सरकारको तर्फबाट रोस्टरमा पठाएका सबै जनालाई लैजानका लागि लबिङ गर्ने कार्य पनि भइरहेको सुनुवारले बताएका छन् ।
इजरायल जान ४ हजार २ सय महिला र ५ हजार ४ सय ९९ पुरुष गरी ९ हजार ६ सय ९९ नेपालीले आवेदन दिएका थिए । जसमध्ये ६ हजार ३ सय ९७ जना लिखित परीक्षामा सहभागी भएकोमा १ हजार ३ सय ९५ जना महिला र ६ सय ४४ पुरुष गरी कुल २ हजार ३९ जनाले लिखित परीक्षामा उत्तीर्ण भएका थिए । तिनैमध्ये अन्तर्वार्तामा १ हजार ८ सय ३ जना सहभागी भएका थिए । अन्तर्वार्ताबाट १ हजार १ सय २० जना महिला र ४ सय ८० जना पुरुष गरी १ हजार ६ सय जनाको नाम सिफारिस गरिएको सुनुवारले बताए । पहिलो चरणमा सिफारिसमा परेका १ हजार ६ सयलाई इजरायल सरकारले कम्प्युटर प्रणालीमार्फत ७० प्रतिशत महिला र ३० प्रतिशत पुरुष छनोट गर्ने र रोजगारीका लागि इजरायल जान पाउने बताइएको छ ।
-1745656903.jpeg)