काठमाडौं– चालू आर्थिक वर्षको सुरुको महिना साउनमा बिप्रेषण आप्रवाह घटेको छ । नेपाल राष्ट्र बैंकले बिहीबार सार्वजनिक गरेको चालू आवको विवरणअनुसार साउन महिनामा बिप्रेषण आप्रवाह १८.१ प्रतिशतले कमी आएर रु ७५ अर्ब ९६ करोड विप्रेषण कायम भएको तथ्यांकले देखाएको हो ।
अघिल्लो वर्षको सुरुको महिनामा बिप्रेषण आप्रवाह २३ प्रतिशतले बढेको थियो । साउन महिनामा अमेरिकी डलरमा बिप्रेषण आप्रवाह १७.५ प्रतिशतले घटेर ६३ करोड ८२ लाख पुगेको छ । अघिल्लो वर्ष यस्तो आप्रवाह १४.५ प्रतिशतले बढेको राष्ट्र बैंकको तथ्यांकले देखाएको छ । सो अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्यामा उल्लेख्यरूपमा वृद्धि भई १३ हजार ८ सय पुगेको राष्ट्र बैंकको तथ्यांकले देखाएको छ । अघिल्लो वर्षको सोही अवधिमा यस्तो संख्या ९९.२ प्रतिशतले घटेको थियो ।
त्यसैगरी वैदेशिक रोजगारीका लागि पुनः श्रम स्वीकृति लिने नेपालीको संख्या पनि यो अवधिमा २८६.१ प्रतिशतले वृद्धि भई ११ हजार ६ सय २८ पुगेको छ । अघिल्लो वर्षको सोही अवधिमा यस्तो संख्यामा ८० प्रतिशतले गिरावट आएको थियो । साउन महिनामा खुद ट्रान्सफर आय १६.४ प्रतिशतले ओरोलो लागेर रु ८५ अर्ब २१ करोड कायम भएको छ । अघिल्लो वर्षको साउन महिनामा यस्तो ट्रान्सफर २० प्रतिशतले बढेको तथ्यांकले देखाएको छ ।
