काठमाडौं– रोजगारीका लागि इजरायल जान सञ्चालन गरिने परीक्षा निर्धारित मितिमा नै सञ्चालन हुने वैदेशिक रोजगार विभागले जनाएको छ । सर्वोच्च अदालतको आदेशमा परीक्षा रोक्नू भनेर अन्तरिम आदेश नआएकाले परीक्षा निर्धारित समय मै हुने विभागका निर्देशक तथा सूचना अधिकारी कमल ज्ञवालीले बताए ।
सर्वोच्चले परीक्षा रोक्नू नभनेकाले परीक्षा नसर्ने उनले बताएका छन् । अदालतले गरेको फैसलाको आदेश विभागलाई प्राप्त नभएकाले परीक्षा सञ्चालनका विषयमा दुविधामा नपर्न पनि उनले आग्रह गरे । अदालतले स्वास्थ्य मापदण्ड पालना गरेर परीक्षा सञ्चालन गर्न भनेकाले सोहीअनुसार परीक्षा सञ्चालन हुने सूचना अधिकारी ज्ञावालीले बताएका छन् । उनका अनुसार परीक्षा सञ्चालनका लागि स्वास्थ्य मापदण्ड पालना गर्नू र अन्य विषयमा १५ दिनभित्र जबाफ माग गरिएको भन्दै परीक्षा हुनेमा कुनै दुविधा छैन ।
परीक्षा रोकियो भन्ने किसिमको भ्रामक समाचार आइरहेकाले र ती समाचारको पछि नलाग्न पनि उनले सबै परीक्षार्थीलाई आग्रह गरेका छन् । इजरायलमा दीर्घकालीन सेवा केन्द्रमा राजगारीका लागि २८ भदौमा परीक्षा हुने मिति तोकिएको छ । आकर्षक श्रम गन्तव्यका रूपमा हेरिएको इजरायलको परीक्षाका लागि ९ हजार ६ सय ९९ जानको आवेदन परेको थियो । त्यसमध्ये रुजु गर्दा ७ हजार जना परीक्षामा सामेल हुन योग्य रहेको विभागले जनाएको छ । अन्यको आवेदन अस्वीकृत भएको विभागका निर्देशक तथा इजरायल शाखाका प्रमुख डम्बरबहादुर सुनुवारले बताएका छन् ।
