काठमाडौं– लामो समयको लकडाउन र निषेधाज्ञापछि वैदेशिक रोजगार क्षेत्रमा केही आसाका किरणहरू देखिन थालेको छ । कोरोना भाइरस (कोभिड–१९) को कारण जारी खासगरी रोजगार गन्तव्य मुलुकहरूले नेपाली श्रमिक लिन थालेपछि यो क्षेत्रमा केही आसाका किरणहरू देखिन थालेका हुन् ।
कोभिडका शून्य अवस्थामा रहेको यो क्षेत्रमा आसाका त्यान्द्राहरू देखिन थालेको नेपाल वैदेशिक रोजगार व्यवसायी संघका महासचिव सुजितकुमार श्रेष्ठले बताएका छन् । उनका अनुसार कोभिडको समयमा विदेश पठाउने कार्य शून्य रहेको भए पनि अहिले भने दैनिक करिब एक हजार दुई सय जना युवाहरू रोजगारीका लागि विदेश गइरहेका छन् । अहिलेको अवस्था हेर्दा वैदेशिक रोजगारको क्षेत्रमा विस्तारै सुधार देखिन थालेको महासचिव श्रेष्ठले बताए ।
गन्तव्य मुलुकले श्रमिक झिकाउन थालेपछि कोभिड सुरु हुनुभन्दा पहिलेको अवस्थाजस्तो नभए पनि व्यवसायीमा आसा पलाएको उनकाको भनाइ छ । कोभिडभन्दा अगाडिको समयमा नेपालबाट दैनिक एक हजार ६ जना नेपाली युवा रोजगारीका लागि विदेश जाने गरेको उनले बताएका छन् । पछिल्लो समय नेपालबाट साउदी अरब र कतार जाने युवाहरू धेरै रहेको उनले बताए । यता युएईमा भने पुराना र बिदामा नेपाल फर्केकाहरू गइरहेको बताइएको छ ।
नेपालीको मुख्य श्रम गन्तव्य मुलुक मलेसिया भने अहिले पनि बन्द रहेको अवस्था छ । मलेसिया बन्द रहेकाले पनि वैदेशिक रोजगारीमा जाने नेपालीको संख्यामा कही कमी देखिएको व्यवसायीहरूको भनाइ छ । मलेसिया खुलाउने विषयमा नेपाल सरकारले पहल गरिरहेको बताइएको छ । तर, मलेसिया आफैँले बन्द गरेकाले तत्काल खुल्ने विषयमा यसै भन्न सक्ने अवस्था नरहेको महासचिव श्रेष्ठले बताए ।
अहिले पनि मलेसियामा कोरोनाको महामारी दिन दिनै बढिरहेको वल्ड्रोमिटरले जनाइरहेको छ । आइतबार मात्रै मलेसियामा कोरोनाका कारण तीन सय ३६ जनाको मृत्यु भएको छ । आइतबार २० हजार ३ सय ९६ जनामा कोरोना संक्रमण पुष्टि भएको वल्ड्रोमिटरको तथ्यांकले देखएको छ । अहिले पनि त्यहाँ संक्रिय संक्रमितको संख्या २ लाख ५५ हजार ७ सय ८९ जना रहेको छ । हालसम्म मृत्यु हुनेको संख्या १८ हजार २ सय १९ जना पुगेको छ भने संक्रमण पुष्टि हुनेको संख्या १८ लाख ४४ हजार ८ सय ३५ जना पुगेको छ ।
-1745656903.jpeg)