काठमाडौं– नेपालीहरूको श्रम गन्तव्य मुलुक युएईमा खोप लगाएकाहरूलाई क्वारेन्टाइन बस्नु नपर्ने भएको छ । कोरोनाविरुद्धको खोप लगाएकाहरूले ५ सेप्टेम्बर अर्थात् आइतबारदेखि युएईको आबुधाबी जाँदा क्वारेन्टाइनमा बस्नु नपर्ने भएको हो ।
युएईको इमर्जेन्सी, क्राइसिस एन्ड डिजास्टर कमिटीले खोप लगाएर त्यहाँ पुग्नेहरूले क्वारेन्टाइन बस्नु नपर्ने नियम ल्याएको जनाइएको छ । यो नियम अन्तर्राष्ट्रिय उडानमार्फत आउने सबै यात्रुहरूका लागि लागू हुने त्यहाँका स्थानीय सञ्चार माध्यमहरूले जनाएका छन् । खोप लगाएका र युएईले ग्रिन लिस्टमा राखेका देशबाट आउने यात्रुले ४८ घन्टा अगाडिको पिसिआर नेगेटिभ रिपोर्ट भने देखाउनु पर्ने बताइएको छ । यस्तै आबुधाबी पुग्नासाथ पिसिआर परीक्षण गर्नुपर्छ भने त्यहाँ पुगेको ६ दिनपछि पुनः पिसिआर परीक्षण गर्नु पर्ने नियमलाई भने यथावत् राखिएको छ ।
युएईको ग्रिन जोनमा रहेकाभन्दा अन्य देशबाट त्यहाँ पुग्ने यात्रुहरूले पनि ४८ घन्टाभित्रको पिसिआर नेगेटिभ रिपोर्ट भने अनिवार्य देखाउनु पर्ने समाचारमा जनाइएको छ । यसरी आबुधाबी पुग्नेहरूको तत्कालै पिसिआर परीक्षण हुनेछ भने त्यहाँ पुगेको चौँथो र आठौँ दिनमा पनि पिसिआर परीक्षण गर्नु पर्ने नियम रहेको बताइएको छ । यस्तै कोरोनाविरुद्धको खोप नलगाएका तर ग्रिन लिस्टमा परेका देशबाट गएकाहरूले पनि प्रस्थानभन्दा ४८ घन्टा अगाडिको पिसिआर नेगेटिभ रिपोर्ट देखाउन पर्ने, आबुधाबी पुगेपछि पनि पिसिआर परीक्षण गर्नु पर्ने तर क्वारेन्टाइनमा भने बस्नु नपर्ने बताइएको छ ।
त्यसपछि ६ दिनमा र ९ दिनमा पुनः पिसिआर परीक्षण गर्नु पर्ने नियम बनाइएको समाचारमा उल्लेख गरिएको छ । तर खोप नलगाएका तथा रेडलिस्टमा परेका देशबाट आएका यात्रुले भने प्रस्थानभन्दा ४८ घन्टा अगाडिको पिसिआर नेगेटिभ रिपोर्टका साथै आबुधाबी पुगेपछि १० दिन अनिवार्य क्वारेन्टाइन बस्नु पर्ने उल्लेख गरिएको छ । त्यस्ता व्यक्तिको ९ दिनको दिनमा पिसिआर परीक्षण गर्नु पर्नेछ ।
-1745656903.jpeg)