काठमाडौं– नेपालबाट इजरायलमा तालिम तथा अध्ययनका लागि गएका १० जना नेपाली सम्पर्कविहीन बनेको समाचार छ । नेपालको साना किसान विकास बैंकबाट छनोट भई ११ महिने तालिम तथा अध्ययनका लागि इजरायल गएका ती १० जना युवा सम्पर्कविहीन बनेका हुने ।
उनीहरूको कुनै पनि व्यक्ति सम्पर्कमा नरहेको इजरायलमा रहेको नेपाली दूतावासले जनाएको छ । सेडोट नेगेभ एग्रिकल्चर ट्रेनिङ सेन्टरबाट ४ जना, द एक्सट्रनल स्टडिज इन्टिच्युटबाट २ जना, एक कलेजबाट २ जना र अराभ इन्टरनेसनल सेन्टर फर एग्रिकल्चर ट्रेनिङ सेन्टरबाट २ जना सम्पर्कविहीन भएको दूतावासले विज्ञप्तिमार्फत जानकारी दिएको छ ।
तालिम तथा अध्ययनका लागि इजरायल पुगेका विद्यार्थीहरू यसरी सम्पर्कविहीन भएकोप्रति ध्यानाकर्षण भएको भन्दै दूतावासले देशको प्रतिष्ठालाई समेत ख्याल नगरी व्यक्तिगत स्वार्थ र लाभका लागि गैरकानुनी हिसाबले इजरायलमा नबस्न आग्रहसमेत गरेको छ । ‘दुई चार जनाको बद्मासीले गर्दा वार्षिक ५ सय जनाको ढोका बन्द गरिनु अपराध हो, दूतावासले यो संख्यालाई बढाएर वार्षिक एक हजार पुर्याउने प्रयास भइरहेको समयमा यस्ता गतिविधिको कारणले गर्दा समग्र कार्यक्रम नै बन्द हुन सक्ने देखिन्छ,’ दूतावासको विज्ञप्तिमा भनिएको छ ।
विद्यार्थीबाहेक रोजगारीको सिलसिलामा इजरायल पुगेकाहरूमध्ये केही सम्पर्कविहीन भएको भन्दै दूतावासले सचेत हुन भनेको छ । सम्पर्कविहीन भएकाहरूको खोजी भइरहेको पनि दूतावासले जनाएको छ । यसरी सम्पर्कविहीन भएर काम गरेकाहरूलाई प्रहरीको सहयोगमा पक्राउ गरी जतिसक्दो छिटो नेपाल पठाउन समन्वय भइरहेको दूतावासले जनाएको छ । सम्पर्कविहीन भएर काम गरिरहेकाहरूलाई दूतावासले छिटो सम्पर्कमा आउनसमेत आग्रह गरेको छ । सम्पर्कमा नआउनेहरूलाई कारबाहीको प्रक्रिया अघि बढाउने दूतावासले जनाएको छ ।
-1745656903.jpeg)