काठमाडौं– वैदेशिक रोजगारीका लागि इजरायल जान आवेदन दिएकाहरूको लिखित परीक्षा २८ भदौमा सञ्चालन हुने भएको छ । वैदेशिक रोजगार विभागले मंगलबार सूचना निकालेर परीक्षाको मिति २८ भदौका लागि तोकेको हो ।
विभागले १२ साउनदेखि २१ दिनको म्याद राखेर आवेदन खुल्ला गरेको थियो । सो अवधिमा आवेदन दिएकाहरूका लागि हुने लिखित परीक्षाको मिति सार्वजनिक गरिएको हो । विभागको सूचना अनुसार इजरायलमा नेपाली सहयोगी श्रमिक पठाउने सम्बन्धी निर्देशिका, ०७८ बमोजिमको अंग्रेजी भाषाको लिखित परीक्षा भौतिक उपस्थतिमै हुनेछ । लिखित परीक्षाका लागि काठमाडौंका विभिन्न स्थानमा परीक्षा केन्द्र तोकिने जनाइएको छ । परीक्षा २८ भदौका दिन दिउँसो १ बजे सञ्चालन हुने गरी परीक्षाको मिति तोकिएको विभागअन्तर्गतको इजरायल शाखाका प्रमुख डम्बरबहादुर सुनुवारले बताएका छन् । उनका अनुसार आवेदन दिएकाहरूको आवेदनउपर अहिले रुजुको कार्य भइरहेको छ । रुजु गरेर अन्तिम नामावाली प्रकाशन गरिने उनले बताए । रुजु गरेर तयार भएको अन्तिम सूचीमा परेका उम्मेदवाहरूले मात्रै परीक्षामा सहभागी हुन पाउने बताइएको छ ।
दुई घन्टासम्म सञ्चालन हुने परीक्षाका लागि परीक्षार्थी सम्बन्धित केन्द्रमा तीन घन्टाअघि नै पुग्नु पर्ने र स्वास्थ्य सम्बन्धी सम्पूर्ण मापदण्ड पालना गर्नुपर्ने प्रमुख सुनुवारले बताएका छन् । परीक्षामा सहभागी हुनुअघि अनलाइन आवेदन दिएर दरखास्त स्वीकृत भएको हुनुपर्नेछ । दरखास्त स्वीकृत भएको/नभएको जानकारी आवेदनकर्ताले अनलाइनमै लग इन गरेर हेर्न सक्नेछन् । साथै आवेदन स्वीकृत भएकाहरूलाई मेल तथा म्यासेज पनि जानकारी पठाइने उनले बताए । प्रवेशपत्रसमेत अनलाइनबाटै प्राप्त गर्न सकिने र प्रवेश पत्रमा नै परीक्षा केन्द्रका जानकारी उल्लेख हुने विभागले जनाएको छ ।
अंग्रेजी भाषा परीक्षाका लागि विभागले विज्ञ समिति बनाएको र त्यही विज्ञ व्यक्तिहरूको सहयोगमा नै परीक्षा सञ्चालन हुने बताइएको छ । परीक्षामा परीक्षार्थीले प्राप्त गरेको अंक सम्बन्धित व्यक्तिको अनलाइन प्रोफाइलमा नै देखिने गरी राखिने व्यवस्थासमेत गरिएको विभागले जनाएको छ । नेपाल सरकारले इजरायलमा रोजगारीका लागि जान इच्छुक युवाहरूलाई २१ दिनको समय तोकेर १२ साउन देखि ३२ साउनसम्म आवेदन दिन माग गरेको थियो । निर्धारित समयअवधिमा ९ हजार ६ सय ९९ जनाको आवेदन परेको इजरायल शाखाका प्रमुख सुनुवारले बताएका छन् ।
-1745656903.jpeg)