काठमाडौं– नेपाल वैदेशिक रोजगार व्यवसायी संघले नयाँ महानिर्देशकलाई स्वागत गरेको छ । बिहीबार नियुक्त भएका महानिर्देशक दीपक काफ्लेलाई संघका कार्यवाहक अध्यक्ष कमल तामाङको नेतृत्वमा गएको टोलीले स्वागत गरेको छ । स्वागत गर्न पुगेका व्यवसायीहरूले वैदेशिक रोजगारका क्षेत्रमा भएका समस्या समाधानका लागि पहल गर्न महानिर्देशक काफ्लेलाई अनुरोध गरेका छन् ।
सो अवसरमा संघका कार्यवाहक अध्यक्ष तामाङले कोभिडको महामारीको समयमा व्यवसायीको धरौटी रकम केही समयका लागि व्यवसायीलाई फिर्ता गर्नेतर्फ पहल गर्नका लागि अनुरोध गरेका छन् । इराक घटनाको समय व्यवसायीले धरौटी रकम प्रयोग गरेको नजिर दिँदै तामाङले यसपटक पनि व्यवसायीले त्यो रकम सञ्चालन गर्न पाउनु पर्ने धारण व्यक्त गरे ।
त्यस्तै लोकतान्त्रिक वैदेशिक रोजगार एसोसियसनका अध्यक्ष नरेन्द्र ढकालले पनि यो क्षेत्रमा देखिएको विकृति र विसंगति सुधार गर्दैै अगाडि बढ्नु पर्ने बताएका छन् । श्रमिकलाई सुखी बनाउँदा विभागमा गुनासा कम आउने भन्दै यसतर्फ विभागले ध्यान दिनु पर्ने उनले बताए । व्यवसायीको तर्फबाट जस्तोसुकै सहयोग गर्न तयार भएको भन्दै समस्या समाधानका लागि महानिर्देशकले पहल गर्नु पर्ने उनको भनाइ थियो ।
स्वागत कार्यक्रममा बोल्दै महानिर्देशक काफ्लेले सबैसँग सहकार्य गरेर अगाडि बढ्ने प्रतिबद्धता व्यक्ति गरेका छन् । सबैसँग हातेमालो गर्दै यो क्षेत्रका समस्या समाधानका लागि आफू तत्पर रहेको उनले बताए । विभागको कार्य नै वैदेशिक रोजगारीलाई प्रवद्र्धन गर्ने भएकाले त्यसका लागि सबै मिलेर अगाडि बढ्नु पर्ने उनले बताए । विभागका तत्कालीन महानिर्देशक कृष्णप्रसाद दवाडीले उमेरहदका कारण अवकाश पाएपछि रिक्त रहेको महानिर्देशक पदमा सरकारले काफ्लेलाई सरुवा गरेको हो ।
