काठमाडौं– विदेश जान आवश्यक पर्ने प्रहरी प्रतिवेदनको प्रमाणपत्र प्रमाणीकरणको काम अनलाइन प्रणालीबाट हुने भएको छ । कन्सुलर सेवा विभागले एक सूचना जारी गर्दै यो सेवा आइतबार अर्थात १३ भदौदेखि अनलाइन प्रणालीबाट हुने बताएको हो ।
सेवाग्राहीलाई सहज एवं सरलरूपमा सेवा प्रवाह गर्न विभागले ‘अनलाइन’ प्रणालीबाट सेवा सुरु गरेको विभागले जनाएको छ । यसका लागि सेवाग्राहीले अनलाइन वा विभागको वेबसाइटमा गएर आवेदन दिन सक्ने बताइएको छ । सेवाग्राहीले भरेको आवेदन स्वीकृत भएपछि सेवाग्राहीले फारम भर्दा राखेको मोबाइल नम्बरमा सन्देश पठाइने विभागले जनाएको छ । त्यसपछि सेवाग्राहीले राजस्व रकमसमेत अनलाइनबाट भुक्तानी गर्न सक्ने छन् । कनेक्ट आइपिएसबाट सोझै विद्युतीय भुक्तानी वा देशभरका ग्लोबल आइएमई बैंकका शाखामार्फत भौतिकरूपमा पनि राजस्व दाखिला गर्न सकिने बताइएको छ ।
राजस्व दाखिला गरिसकेपछि प्रमाणपत्र लिनका लागि नागरिकता वा फोटोसहितको परिचय पत्र लिएर आउन पनि विभागले अनुरोध गरेको छ । यो सेवा अहिले काठमाडौंमा मात्रै उपलब्ध रहेको विभागले जनाएको छ । प्रहरी प्रमाणपत्र प्रमाणीकरणबाहेक अन्य सेवा पनि क्रमशः अनलाइनबाटै गर्ने गरी अगाडि बढिरहेको विभागले जनाएको छ । अनलाइन प्रणालीले फर्जी कागतपत्र बन्ने जोखिम पनि पूर्णरूप हट्ने विभागको विश्वास रहेको छ ।
-1745656903.jpeg)