काठमाडौं– नेपालीहरूको प्रमुख गन्तव्य मुलुक मलेसियामा कोरोना संक्रमण दर बढ्दै गएको छ । कोरोनाको तथ्यांक सार्वजनिक गर्ने वल्ड्रोमिटरका अनुसार मलेसियामा दिन प्रतिदिन कोरोना संक्रमण हुनेको संख्यमा भारी मात्रामा वृद्धि हुँदै गएको हो ।
मलेसियामा पछिल्लो समय दैनिक २० हजारभन्दा बढीमा कोरोना संक्रमण पुष्टि हुने गरेको छ । त्यहाँ बिहीबार मात्रै २४ हजार ५ सय ९९ जनामा कोरोना संक्रणम पुष्टि भएको वल्ड्रोमिटरले जानएको छ । जबकि बुधबार २२ हजार ६ सय ४२ जनामा कोरोना संक्रमण पुष्टि भएको थियो । बिहीबार संक्रमण पुष्टि भएको संख्या एकै दिन संक्रणम हुने अहिलेसम्म कै सबैभन्दा धेरै हो ।
त्यहाँको स्वास्थ्य मन्त्रालयका अनुसार नयाँ संक्रमितमध्ये ८० प्रतिशत कोरोनाको खोप लाउँदै नलाएका तथा पूर्ण मात्रामा नलगाएकाहरू छन् । संक्रमितहरूमध्ये ९७ प्रतिशतमा कुनै पनि लक्षण नदेखिएको बताइएको छ । त्यस्तै मलेसियमा कोरोना संक्रमणका कारण बिहीबार ३ सय ९३ जनाको मृत्यु भएको बताइएको छ । जुन अघिल्लो दिनको भन्दा १ सय २८ जनाले बढी हो । बुधबार २ सय ६५ जनाले कोरोनाका कारण ज्यान गुमाएका वल्ड्रोमिटरको तथ्यांकले देखाएको छ ।
कोरोनाका कारण हालसम्म मलेसियमा ज्यान गुमाउनेको संख्या १५ हजार २ सय ११ जना पुगेको छ । त्यहाँ अहिलेसम्म कोरोना संक्रमण पुष्टि हुनेको संख्या १६ लाख ४० हजार ८ सय ४३ पुगेको छ । जसमध्ये १३ लाख ५९ हजार ७ सय ९१ जना निको भएको तथ्यांकले देखाएको छ । अहिले पनि मलेसियामा संक्रिय संक्रमितको संख्या २ लाख ६५ हजार ८ सय ४१ जना रहेको छ । मलेसियाले कोरोनाको उच्च जोखिम रहेको भन्दै नेपालसहित बंगलादेश, भारत, पाकिस्तान श्रीलंकाबाट उडान प्रतिबन्ध लगाएको छ । यी देशका उडान मलेसियामा ट्रान्जिट भएर पनि जान पाउँदैनन् । तर कूटनीतिक नियोगका कर्मचारी तथा मलेसियन नागरिकहरूले भने स्वास्थ्य मापदण्ड पालना गरस् प्रवेश गर्न पाउने व्यवस्था गरिएको छ ।
