काठमाडौं– रोजगारीका लागि कोरिया जाने श्रमिकका लागि बिमा गर्नका लागि ६ वटा कम्पनी छनोट भएका छन् । इपिएस कोरिया शाखाले आवेदन माग गरेबमोजिम प्राप्त आवेदनमध्येबाट ६ वटा कम्पन्नी छनोट भएका हुन् ।
शाखाले कोरियामा १४ दिन क्वारेन्टाइनबा बस्दाको समयका लागि बिमा गर्न इच्छुक कम्पनीलाई आवेदन दिन आग्रह गरेको थियो । जसअनुसार अजोड इन्स्योरेन्स लिमिटेड, प्रिमियर इन्स्यनेरेन्स कम्पनी नेपाल लि., शिखर इन्स्योरेन्स कम्पनी लि. एनएलजी इन्स्योरेन्स कम्पनी लि., प्रभु इन्स्योरेन्स लि. र आइएमई जनरल इन्स्योरेन्स लि छनोट भएको इपिएस शाखाले जनाएको छ । कोरिया सरकारले कोरिया पुगेको १४ दिनसम्मका लागि ५ हजार डलर बराबरको बिमा गर्नु पर्ने सर्तअनुसार आवेदन माग गरिएको बताइएको छ ।
इपिएस सञ्चालन तथा व्यवस्थापन निर्देशिका ०७३ को दफा २० बमोजिम दक्षिण कोरिया जाने कामदाहरूको बिमा गर्नका लागि यी कम्पन्नीहरू छनोट गरिएको इपिएस शाखा कोरियाले सूचना प्रकाशन गरेर जानकारी दिएको छ । वैदेशिक रोजगार विभागअन्तर्गतको इपिएस कोरिया शाखाले २५ जेठमा इच्छुक कम्पनीलाई आवेदन दिन सूचना जारी गरेको थियो । तोकेबमोजिमको बिमा प्रिमियमबापतको रकममा कुनै सेवा शुल्क नलिई र नकटाई सेवा प्रदान गर्न इच्छुक बिमा कम्पनीहरूलाई आवेदन दिन भनिएको थियो ।
कोरिया सरकारले पछिल्लो समय कोरिया जानका लागि सिधा उडान हुनु पर्ने, श्रमिक कोरियाले तोकेको होटल क्वारेन्टाइनमा १४ दिन बस्नु पर्ने, सो अवधिको बिमा गर्नु पर्ने र त्यसबापत लाग्ने खर्च श्रमिक आफैँले बेहोर्नु पर्ने सर्त राखेको छ । कोरियाले राखेका सर्तअनुसार नै काम भइरहेको बताइएको छ । केही दिन अघि मात्रै सिधा उडानका लागि टिकट आपूर्ति गर्नका लागि बोलपत्रसमेत आह्वान गरिसकिएको छ ।
-1745656903.jpeg)