काठमाडौं– वैदेशिक रोजगार विभागका महानिर्देशक कृष्णप्रसाद दवाडीले प्रमाणपत्र लिनेभन्दा पनि सीप सिक्नेतर्फ लाग्नु पर्ने बताएका छन् । नेपाल सरकारले इजरायलको स्याहार केन्द्रमा श्रमिक पठाउन आवेदन माग गरेपछि प्रमाणपत्र खोज्ने गरेको सुनिएको भन्दै युवाहरूले सीप सिक्नु पर्ने उनले बताएका हुन् ।
प्रमाणपत्र बनाएर गए पनि सम्बन्धित विषयमा ज्ञान नभएपछि स्वदेश फर्किनु पर्ने अवस्था आइपर्ने भन्दै यस्तो कार्यले रोजगारदाता मुलुकमा नेपालको नकारात्मक सन्देश प्रवाह हुने उनको भनाइ छ । उनका अनुसार यसरी गएपछि काम आउँदैन त्यसपछि उताबाट नेपाल फर्काइदिन्छ, अनि म्यानपावरबाट गएको भए म्यानपावरले भनेअनुसारको काम दिएन भनेर झगडा गर्न विभागमा आउने र सरकारले गरेको भए पनि यहिँ आएर झगडा गर्ने हो । यस्तो अवस्था नआउनका लागि तालिम दिने संस्था खोजेर पहिलो तालिम लिएर योग्य बन्नु पर्ने उनले बताए ।
विभागमा तालिम लिन पाइएन भनेर आउने गरेको सुनाउँदै महानिर्देशक दवाडीले सिटिइभिटीबाट सम्बन्धन लिएर कियर गिभिङको तालिम दिने संस्थामा गएर तालिम लिनका लागि सुझाब दिने गरेको बताएका छन् । पहिलो चरणमा इजरायल पठाउने कार्य सम्पन्न भएको खण्डमा फेरि पनि श्रमिक पठाउने विषयमा छलफल भइरहेको भन्दै सर्टिफिकेट बनाउने ठाउँ खोज्नुभन्दा पनि सीप सिक्नेतर्फ लाग्नु पर्ने दवाडीले बताए । यो पटकका लागि भएन अर्को पटकका लागि भनेर अहिलेदेखि नै तयारी गर्नेतर्फ उनले सबैलाई सुझाब दिने गरेको बताएका हुन् ।
इजरायल सरकारले नेपालको छनोट प्रक्रियालाई राम्रो मानेको खण्डमा फेरि पनि यस्तो श्रमिकको माग आउने भएकाले यसलाई सफल बनाउनेतर्फ लाग्नु पर्ने महानिर्देशक दवाडीको भनाइ छ । यसले आगामी दिनका लागि पनि ढोका खुल्ने यो छनोटमा इजरायल सरकारलाई प्रभाव पार्ने गरी गर्नु पर्ने चुनौति रहेको उनले बताए । कोरियाभन्दा पनि आकर्षक गन्तव्यका रूपमा हेरिएको इजरायलका लागि ९ हजार ६ सय ९९ जनाको आवेदन परेको छ ।
आवेदन दिएकामध्ये १ हजार ६ सय ८० जनालाई लिखित परीक्षामा उत्तीर्ण गराइने वैदेशिक रोजगार विभागअन्तर्गतको इजरायल शाखाका प्रमुख डम्बरबहादुर सुनुवारले बताएका छन् । उनका अनुसार यसमध्ये पनि अन्तर्वार्ताबाट जम्मा १ हजार ४ सय जना उत्तीर्ण हुने छन् । यसमध्येबाट पनि १ हजार जना मात्रै इजरायल जान पाउने उनले बताए । जसमध्ये ७० प्रतिशत महिला र ३० प्रतिशत पुरुष रहने बताइएको छ ।
-1745656903.jpeg)