काठमाडौं– रोजगारीका लागि कोरिया जान नपाएकाका श्रमिकहरू जान पाउने सम्भावना बढ्दै गएको छ । वैदेशिक रोजगार विभागअन्तर्गतको इपिएस कोरिया शाखाले नेपालबाट सिधै कोरिया श्रमिक पठाउनका लागि टिकट आपूर्ति सम्बन्धी बोलपत्र आह्वान गरेसँगै कोरिया जान पाउने सम्भावना बढेको हो ।
कोरोना भाइरसको कारण लामो समयसँग कोरिया जान नपाएका श्रमिकका लागि यस प्रक्रियाले केही राहत मिलेको सरोकारवालको भनाइ छ । ३० दिनको समय सीमा तोकेर बुधबार सिधै यात्रु पठाउनका लागि इच्छुक एयरलाइन्सबाट आवेदन माग गरिएको इपिएस शाखा कोरियाका निर्देश इन्द्र गौतमले बताएका छन् । कोरिया पठाउनका लागि यसअघि पनि टेन्डरबाटै टिकट आपूर्ति हुने गरेको र यसपटक सिधै कोरियाका लागि टेन्डर गरिएको गौतमले बताए । यसअघि ट्रान्जिटबाट कोरिया पठाइने गरिएको भए पनि कोभिडका कारण कोरियाले सिधै उडानबाट कोरिया आउन सर्त राखेकाले सोहीअनुसार सिधा उडानका लागि बोलपत्र आह्वान गरिएको उनको भनाइ छ ।
टिकट आपूर्तिका लागि बोलपत्र आह्वान कोरियाले राखेका सर्तहरूमध्ये एक भएको र त्यो पूरा गर्ने प्रक्रिया सुरु भएको भन्दै यसलाई कोरिया जाने निश्चित रूपमा नबुझ्न उनले आग्रह गरेका छन् । नेपाल सरकारले श्रमिक पठाउनका लागि कोरियाले राखेका सर्तहरू पूरा गरेर पठाउन पहल गरिरहेको उनको भनाइ छ । सबै सर्त पूरा गरेपश्चात कोरियाले कोभिड–१९ को अवस्था हेरेर मात्र स्वीकृति दिएपछि मात्र श्रमिकहरू कोरिया जान पाउने बताइएको छ । ‘यो पनि कोरियाले रोखेको सर्त मध्ये एक थियो त्यसै अनुसार काम गरिएको हो, यसबाट आसा गर्ने ठाउँ भए पनि कोरिया जाने पाइने पक्का भएको रूपमा लिन सकिँदैन,’ गौतमले भने ।
कोरियामा एउटा कमिटी रहेको र उसले कति श्रमिक लैजाने भन्ने विषयमा निर्णय गर्नु पर्ने र श्रमिक लैजानका लागि पनि स्विकृति आवश्यक हुने बताइएको छ । नेपालमा अहिले करिब १० हजारभन्दा बढी श्रमिक कोरिया जाने पर्खाइमा रहेको इपिएस कोरिया शाखाले जनाएको छ । त्यसमध्ये करिब ३ हजार कमिटेड श्रमिक रहेको बताइएको छ । राष्ट्रियसभाको प्रत्यायोजित व्यवस्थापन तथा सरकारी आश्वासन समितिले भाषा परीक्षा पास गरेका र कमिटेड श्रमिकलाई सम्पूर्ण प्रक्रिया पूरा गरेर कोरिया पठाउनका लागि केही समयअघि सरकारलाई निर्देशनसमेत दिएको थियो ।
कोरियाले कोरिया सिधा उडानबाट कोरिया आउनु पर्ने, कोरियाले तोकेको क्वारेन्टाइनमा बस्नु पर्ने, क्वारेन्टाइन बस्दाको बिमा गर्नु पर्नेलगायत स्वास्थ्य मापदण्ड पालना गर्नु पर्नेलगायत सर्त राखेको थियो । साथै यसका लागि लाग्ने सबै खर्च श्रमिक स्वयंले बेहोर्नु पर्ने उल्लेख गरेको थियो । समितिले कोरिया पठाउनका लागि सहज बनाउनका लागि १५ दिनभित्र आवश्यक कार्यविधि बनाएर प्रस्तुत गर्नका लागि श्रम रोजगार तथा सामाजिक सुरक्षा मन्त्रालयलाई निर्देशनसमेत दिएको थियो । कोरियाले अहिले नेपालबाट मात्र नभएर अन्य मुलुकबाट पनि श्रमिक नलिएको र कोभिडको अवस्था सामान्य भएपछि मात्रै कोरियाले श्रमिक लैजाने बताएको इपिएस कोरिया शाखाका निर्देशक गौतमले बताएका छन् । कोरियाले १६ वटा देशबाट श्रमिक लैजाने गरेको भए पनि अहिले सबैतिरबाट श्रमिक लैजानका लागि रोक लगाइएको उनले बताए ।
