काठमाडौं– वैदेशिक रोजगारीका लागि खाडीका ६ देश र मलेसिया रहेका ५४५ जना नेपाली जेलमा थुनिएका छन् । वैदेशिक रोजगार बोर्डको पछिल्लो तथ्यांकअनुसार विभिन्न मुद्दामा ५ सय २६ जना पुरुष र १९ जना महिला गरी ५४५ नेपाली श्रमिक जेल परेका हुन् ।
वैदेशिक रोजगार बोर्डको तथ्यांकअनुसार खाडी मुलुक युएईमा मात्रै १ सय ८५ जना श्रमिक जेलमा परेका छन् । जसमध्ये १ सय ७३ जना पुरुष र १२ जना महिला रहेको बोर्डको तथ्यांकले देखाएको छ । त्यस्तै कुवेतमा ५८ जना जेलमा परेका छन् । जसमध्ये ३ जना महिला र ५५ जना पुरुष रहेको बताइएको छ । त्यस्तै साउदीमा ५४ जना कतारमा ३५ जना, बहराइमा ५ र ओमानमा ३ जना जेलमा रहेका छन् । रोजगारीको प्रमुख गन्तव्य मुलुक मलेसियामा २ जना महिला र २ सय ३ जना पुरुष गरी २ सय ५ जना जेलामा रहेको बोर्डले जनाएको छ ।
जेलमा रहेका नेपाली मध्ये २५ जनालाई मृत्यु दण्डको सजाय सुनाइएको बताइएको छ । बोर्डका अनुसार मलेसियमा १६ जना, साउदी अरबमा ५ जना, कुवेतमा ३ जना र युएईमा १ जनालाई मृत्युदण्डको सजाय सुनाइएको छ । यसैबीच, १६ जनालाई भने आजीवन कारावासको सजाय तोकिएको छ । कुवेतमा ९ जनालाई, युएईमा ४ र कतारमा ३ जनालाई आजीवन कारावासको सजाय तोकिएको बोर्डको तथ्यांकमा उल्लेख छ ।
बहराइमा रोजगारीका लागि गएका २ जना नेपाली श्रमिकलाई २५ वर्षको जेल सजाय तोकिएको छ । त्यस्तै कुवेत र कतारमा एक एक जनालाई १५ वर्षको जेल सजाय तोकिएको बताइएको छ ।
३६ जना नेपालीहरूलाई १५ वर्षभन्दा कम जेल सजाय तोकिएको छ । कुवेतमा ३१, युएईमा ४ र बहराइनमा १ गरी ३६ जना नेपाली १५ वर्षभन्दा कम समयको जेल सजाय भोगिरहेका छन् । यस्तै २९ जनालाई १० वर्षभन्दा कम, १ जना ५ वर्षभन्दा कम, ४४ जनालाई एक वर्षभन्दा कम, ७५ जनालाई ३ महिनाभन्दा कमको जेल सजाय तोकिएको बताइएको छ । २ सय ९३ जनाको सजाय तोक्न बाँकी रहेको र १८ जनालाई जरिवाना तोकिएको बोर्डले जनाएको छ ।
-1752335779.jpg)
