काठमाडौं– नेपाल र मलेसियाबीच नियमित उडान सञ्चालनका गराउनका लागि गृहमन्त्री बालकृष्ण खाँडलाई ज्ञापन पत्र बुझाइएको छ । नेपाली जनसम्पर्क समिति मलेसियाले दुई देशबीच नियमित हवाइ उडान गर्न माग गर्दै गृहमन्त्री खाँडलाई ज्ञापन पत्र बुझाएको हो ।
मलेसियामा करार सम्झौता सकिएकाहरू नेपाल फर्किन समस्या भएको भन्दै समितिले नियमित उडानका लागि पहल गरिदिन गृहमन्त्रीलाई अनुरोध गरेको जनाइएको छ । कोभिड–१९ का कारण रोजगारी गुमाउनु पर्ने समस्या रहेको समयमा स्वदेश फर्किनका लागि समेत नियमित उडान नहुँदा थप समस्यामा परेको जनसम्पर्क समितिले जानाएको छ । यो अवस्थामा श्रमिकलाई केही भए पनि राहत प्रदान गर्नका लागि नियमित उडान गर्नु पर्ने समितिले ध्यानाकर्षण पत्रमा उल्लेख गरेको छ ।
अहिलेसम्म मलेसियामा २४ वटा शवहरू अलपत्र अवस्थामा रहेको भन्दै ती शवलाई नेपाल फर्काउनका लागि वाइडबडी विमान पठाउने व्यवस्था गर्न पनि पत्रमा भनिएको छ । न्यारोवडी विमानले शव ढुवानी गर्न नसक्ने अवस्थामा शव नेपाल पठाउन समस्या भएको बताइएको छ । करिब तीन लाख नेपाली श्रमिक रहेको मलेसियमा आफ्नै सेल्टर भएको खण्डमा श्रमिकलाई कानुनी न्याय पाउनका साथै अलपत्र, अंगभंग भएका, बिरामी भएकाहरूलाई राहत मिल्ने भन्दै त्यसको व्यवस्थाका लागि पनि पहल गरिदिन गृहमन्त्रीलाई बुझाइएको ध्यानाकर्षण पत्रमा उल्लेख गरिएको छ ।
