काठमाडौं– वैदेशिक रोजगारीका लागि इजरायल जानका लागि ९ हजार ६ सय ९९ जनाले आवेदन फारम भरेका छन् । वैदेशिक रोजगार विभागले १२ साउनदेखि २१ दिनको समय राखेर आवेदन माग गरेको यो अवधिमा ४ हजार २ सय महिला र ५ हजार ५ सय ९९ जना पुरुष गरी कुल ९ हजार ६ सय ९९ जनाले आवेदन भरेका हुन् ।
एक हजार जनाको कोटा निर्धारण गरी आवेदन माग गरिएको र मागभन्दा झन्डै ८ हजार बढी आवेदन परेको वैदेशिक रोजगार विभागका इजरायल शाखा प्रमुख निर्देशक डम्बरबहादुर सुनुवारले बताएका छन् । विभागमा आएका आवेदनहरूको रुजु गर्ने काम सुरु गरिएको उनले बताए । रुजु गर्ने कार्य सम्पन्न भएपछि लिखित परीक्षा सञ्चालन गरिने उनको भनाइ छ । भदौको तेस्रो हप्ता परीक्षा सञ्चालन गर्ने गरी विभाग अगाडि बढिरहेको निर्देशक सुनुवारले बताए । कुनै पनि आवेदकको आवेदन अस्वीकृत भएको खण्डमा त्यसको जानकारी आवेदकको इमेल र मोबाइल नम्बरमा म्यासेज गरिने विभागले जनाएको छ । परीक्षाको मिति तोकिएपछि पनि खबर गरिने निर्देशक सुनुवारले जानकारी दिए ।
विभागले कोभिड–१९ संकट व्यवस्थापन केन्द्र (सिसिएमसी)सँग भदौ १५ देखि २० गते परीक्षा सञ्चालनका गर्नका लागि अनुरोध गरिएको र सिसिएमसीको निर्देशनअनुसार नै परीक्षा सञ्चालन गरिने विभागले जनाएको छ । लिखित परीक्षाको नतिजा २–३ दिनभित्रै प्रकाशन गरिने र त्यसपछि अन्तर्वार्ताको काम सुरु गरिने बताइएको छ । परीक्षामा सहभागी भएकाहरूमध्य १ जहार ६ सय ८० जनाको नाम अन्तर्वार्ताका लागि छनोट गरिने र त्यसमध्ये १ हजार ४ सय जनालाई उत्तीर्ण हुने निर्देशक सुनुवारको भनाइ छ । त्यसरी उत्तीर्ण भएकामध्ये पनि ४ सय जना भने इजरायल जान नपाउने बताइएको छ । इजरायले पहिलो चरणमा १ हजार जनालाई स्याहार केन्द्रमा रोजगारीका लागि लैजाने जनाइएको छ । इजरायलले नेपालबाट कियर गिभिङ क्षेत्रमा ७० प्रतिशत महिला र ३० प्रतिशत पुरुष श्रमिक लैजाने बताइएको छ ।
इजरायलमा आकर्षक रोजगारीको अवसर रहेकाले विभागमा भनसुनका लागि समेत फोनहरू आउने गरेको वैदेशिक रोजगार विभागका महानिर्देशक कृष्णप्रसाद दवाडीले बताएका छन् । केही दिन अघि पत्रकारहरूसँगको भेटमा उनले यस्तो बताएका हुन् । उनले इजरायल जानका लागि गर्नु पर्ने प्रक्रिया र सिक्नु पर्ने सीप सिक्नतिर लाग्न पनि सबैलाई अनुरोध गरेका थिए । छनोट प्रक्रियामा पूर्ण रूपमा पारदर्शी हुने उनको दाबी छ । इजरायलमा श्रमिक पठाउने विषय नेपाल सरकार र इजरायल सरकारबीचको सम्झौताअनुसार छनोट गरी पठाइने भएकाले कुनै पनि व्यक्ति वा संस्थाले संलग्नता नहरने भएकाले यस्ता व्यक्ति र संस्थाको पछि नलाग्न विभागले अनुरोध गर्दै आइरहेको छ ।
इजरायलका लागि आवेदन दिनका लागि ४५ किलो तौल भएको २५ वर्ष पूरा भएर ४५ वर्ष उमेर नकटेको हुनु पर्ने मापदण्ड तोकिएको छ । त्यस्तै १.५ मिटर उचाइँ र अंग्रेजी भाषाको ज्ञान भएको कक्षा १० पास गरी अनमी वा सिएमए सम्बन्धी १५ महिने अध्ययन पूरा गरेको हुनु पर्ने मापदण्ड तोकिएको थियो । १२ कक्षा उत्तीर्ण गरेकाको हकमा भने नेपाल सरकारले मान्यता दिएको तालिम प्रदायक संस्थाबाट केयर गिभरसम्बन्धी तीन महिनाको तालिम लिएको व्यक्तिले आवेदन दिन सक्ने व्यवस्था रहेको विभागले जनाएको छ ।
-1745656903.jpeg)