काठमाडौं– रोजगारीका लागि अफगानस्तानमा रहेको १ सय ३४ जना नेपाली सम्पर्कमा आएका छन् । पराराष्ट्र मन्त्रालयले सम्पर्कमा आउन अनुरोध गरेअनुसार सोमबार साँझसम्म उनीहरू सम्पर्कमा आएका हुन् । आइतबार मात्रै परराष्ट्र मन्त्रालयले विज्ञप्ति जारी गर्दै अफगानस्तानमा रहेका नेपाली नागरिकको विवरण संकलनका लागि अनलाइन रजिस्ट्रेसनसहित सम्पर्कमा आउनका लागि भाइबर वाट्सएप नम्बरहरू सार्वजनिक गरेको थियो । सोमबार साँझसम्म १ सय ३४ जनाले विभिन्न माध्यामबाट सम्पर्क गरेको मन्त्रालयले जनाएको छ ।
सरकारको सम्पर्कमा आएका व्यक्तिहरूको उद्धारका लागि समेत सहज हुने जनाइएको छ । अफगानस्तानमा रहेका नेपालीहरूबारे जानकारी आउने क्रम जारी नै रहेको पनि मन्त्रालयले जनाएको छ ।अफगानिस्तानमा रहेका नेपाली नागरिक वा उनीहरूको परिवारका सदस्यले कन्सुलर सेवा विभागको वेबसाइटमा आफ्नो नामसहितको विवरण समावेश गर्न सक्ने व्यवस्था गरिएको छ । अवैधानिक रूपमा जाने श्रमिकहरू पनि त्यहाँ अलपत्र परेको हुन सक्ने भएकाले विवरण तयार पार्ने काम गर्नुपरेको मन्त्रालयले जनाएको छ ।
काबुलस्थित विभिन्न मुलुकका कूटनीतिक नियोगहरू तथा अन्तर्राष्ट्रिय संघ संस्थाहरूमा कार्यरत नेपालीहरूलाई तत्काल उद्धार गरी सुरक्षित स्थानमा राख्न र स्वदेश फर्काउन नेपाल सरकारले संयुक्त राज्य अमेरिका, संयुक्त अधिराज्य बेलायत, क्यानडा, जर्मनी, युरोपियन युनियन, जापान तथा संयुक्त राष्ट्रसंघको कार्यालयहरूलाई औपचारिक पत्राचारसमेत गरेको बताइएको छ । ती देश तथा संघ संस्थाले नेपालको आग्रहलाई सकारात्मक रूपमा लिएको बताइएको छ ।
यसैबीच, नेपालबाट अफगानस्तानमा नेपाली श्रमिक पठाउने दुई वटा म्यानपावर कम्पनीले ३ सय ३० जना नेपालीको उद्धार भइसकेको जानकारी दिएका छन् । वैदेशिक रोजगार विभागले नेपालबाट अफगानिस्तानमा पठाउने कार्यमा संस्थागत रूपमा संलग्न दुई वटा म्यानपावर कम्पनीलाई नेपालीको अवस्थाबारे जानकारी लिएर आउन निर्देशन दिएको थियो । सोही अनुसार एफएसआई वल्र्ड म्यानपावर कम्पनी र युनिभर्सल कनेक्सन म्यानपावर कम्पनीले विभागलाई ३ सय ३० जना श्रमिकलाई उनीहरू कार्यरत सम्बद्ध नियोग र कार्यालयले कतारको राजधानी दोहामा ल्याइसकेको जानकारी दिएको विभागले जनाएको छ । सोमबार दिउँसोसम्म ४ सय ३७ जना नेपाली काबुलको अन्तर्राष्ट्रिय एयरपोर्टमा उद्धार गर्न जाने विमानको प्रतिक्षामा रहेको जानकारी ती म्यानपावर कम्पनीले दिएको विभागले जनाएको छ ।
