काठमाडौं– गैरआवासीय संघ (एनआरएन) ले बेलायतमा आमरण अनसनमा बसेका भूतपूर्व गोर्खा सैनिकमाथि भएको प्रहरी दमनको भत्र्सना गरेको छ । एनआरएनका उपाध्यक्ष डा.बद्री केसीले एक भिडियोमार्फत अनसनमा बसेकाहरूमाथि भएको दमनको भत्र्सना गरेका हुन् ।
भिडियोमा उपाध्यक्ष डा. केसीले बेलायतस्थित प्रधानमन्त्री कार्यालयअघि आमरण अनसनमा बसेका भूपू गोर्खामाथि भएको प्रहरी दमन मानवअधिकारको हनन् भएको बताएका छन् । डा.केसीले दुई सय वर्षदेखि बेलायती सेनामा कार्यरत भूपू गोर्खाहरूले साम्राज्य ठूलो पार्न अहं भूमिका खेलेको स्मरणसमेत गरेका छन् । उनले गोर्खाहरूको रगत र बहादुरीले बेलायती साम्राज्य संसारभरि फैलिएको बताउँदै समान पेन्सन र अधिकारका लागि लडिरहेका भूपूगोर्खाहरूको आन्दोलनप्रति संघको ऐक्यबद्धता भएको बताएका छन् ।
यसैबीच, गोर्खा सत्याग्रह संघर्ष समितिले गरेको आमरण अनसनमा एनआरएन युकेले ऐक्यबद्धता जनाएको छ । एनआरएन युकेका नवनिर्वाचित अध्यक्ष प्रेम गाहा मगर नेतृत्वको टोली अनसनस्थल पुगी आन्दोलनप्रति ऐक्यबद्धता जनाएको हो । ऐक्यबद्धता जनाउन एनसिसी युकेका नवनिर्वाचित महासचिव खुसी लिम्बू, आइसिसी सदस्य समीर खनाललगायत अन्य पदाधिकारीहरू अनशनस्थल पुगेको बताइएको छ । भूपूगोर्खाले ब्रिटिस आर्मीसरह नै भूतपूर्व गोर्खा सैनिकहरूले पनि सुविधा पाउनुपर्ने माग गर्दै बेलायती प्रधानमन्त्रीको कार्यालयनजिकै आमरण अनसन गरिरहेका छन् ।
एनआरएनका नवनिर्वाचित अध्यक्ष गाहा मगरले कूटनीतिक माध्यमबाट समस्या समाधान गर्नुपर्ने बताएका छन् । उनले गोर्खा समस्याको दिगो समाधानका लागि आफूले निरन्तर पहल गरिरहेको बताए । यसअघिको कार्यकालमा उपाध्यक्ष रहेको समयमा ५ वटा गोर्खा संस्थाहरूलाई सँगै ल्याएर बेलायतका प्रधानमन्त्री र नेपाल सरकारलाई पत्र लेखेको बताउँदै बेलायत सरकारले पत्रको जवाफ दिए पनि नेपाल सरकारबाट कुनै जवाफ नदिएको पनि बताए । अध्यक्ष गाहा मगरले विश्वव्यापी रूपमा फैलिएको कोभिड महामारीका कारण आन्दोलनमा लचकता अपनाउन संघर्ष समिति र अनसनकारीहरूलाई आग्रहसमेत गरेका थिए । अध्यक्ष गाहा मगरले अनसनकारीहरू बसेको स्थानमा टाँगिएको टेन्ट ब्रिटिस प्रहरीले हटाउन खोजेकोप्रति आपत्ति जनाएका छन् ।
-1745656903.jpeg)