काठमाडौं– कतारमा रहेको नेपाली दूतावासले तीन महिनाको अवधिमा ३४ लाख ३३ हजार ५ सय ६३ रूपैयाँ ९८ पैसा क्षतिपूर्ति प्रदान गरेको छ । दूतावासले वैशाखदेखि असारमसान्तको अवधिमा कन्सुलर सेवा विभागमा ३४ लाख ३२ हजार ६९ रूपैयाँ ९८ पैसा र शब पठाउने क्रममा १ हजार ५ सय रियाल गरी जम्मा ३४ लाख ३३ हजार ५ सय ६३ रूपैयाँ बराबरको क्षतिपूर्ति दिएको हो ।
दूतावासले सार्वजनिक गरेको तीन महिनाको तथ्यांकअनुसार कतारमा ५७ जनाको मृत्यु भएको छ । मृत्यु भएकामध्ये ४६ जनाको शव नेपाल पठाइएको र बाँकी ११ वटा शव परिवारको सहमतिमा कतारमा नै अन्त्यष्टि गरिएको दूतावासले सार्वजनिक गरेको तथ्यांकमा उल्लेख गरिएको छ । यो अवधिमा दूतावासले १ हजार ३ सय ७३ वटा मागपत्र प्रमाणीकरण गरेको छ । जसमा समूहगत रूपमा १ हजार १ सय ३३, व्यक्तिगत १ सय २५ वटा र घरेलु श्रमिकको पुनः श्रम स्वीकृतिको सिफारिस १ सय १५ वटा रहेका छन् । यसबाट २२ हजार १९ जनाले व्यक्तिले सेवा लिएको दूतावासले जनाएको छ । समूहगत रूपमा गरिएको मागपत्र प्रमाणीकरणमा २१ हजार ७ सय ७९ जना व्यक्तिहरूको माग प्रमाणीकरण भएको र व्यक्तिगत तथा घरेलु श्रमिकको पुनः श्रम स्वीकृति भएकाको संख्या २ सय ४० जना रहेको दूतावासले जनाएको छ ।
त्यसैगरी दूतावासले तीन महिनाको अवधिमा विभिन्न किसिमका १७ वटा भिसा जारी गरेको छ । जसमा १५ दिने ७ वटा, ३० दिने ६ वटा, ९० दिन म्याद भएका १ वटा र निःशुल्क ३ गरी १७ वटा भिसा जारी गरेको जनाएको छ । त्यस्तै, दूतावासले विवाह दर्ता, जन्मदर्ता, नाता प्रमाणीकरणलगायतमा १ सय ३ जनाको कागजपत्र प्रमाणीकरण गरेको छ । त्यस्तै, ५२ वटा शैक्षिक प्रमाणपत्र, ३१ वटा वारेसनामा प्रमाणित गरेको छ । त्यस्तै प्रहरी रिपोर्ट, मन्जुरीनामा २८ वटा प्रमाणित गरिएको छ ।
कम्पनी परिवर्तन गर्न चाहाने ४३ जनाका लागि पिसिसी जारी गरिएको दूतावासले जनाएको छ । यो अवधिमा दूतावासले दुई हजार ६ सय ४६ वटा राहदानी वितरण गरेको आफ्नो प्रगति विवरणमा उल्लेख गरेको छ । यो अवधिमा दुई हजार ९ सय ९९ वटा आवेदन परेको जनाइएको छ । यसैबीच, दूतावासले एक सय ७ वटा एकतर्फी यात्रा अनुमति पत्र जारी गरेको जनाएको छ । जसमा ६४ वटा स–शूल्क र ४३ वटा निःशूल्क रहेको बताइएको छ ।
