काठमाडौं– वैदेशिक रोजगारीका लागि कोरिया जान नपाएका श्रमिकको विषयले संघीय संसदमा प्रवेश पाएको छ । मंगलबारको प्रतिनिभिसभाको बैठकमा भाषा पास गरेर बसिरहेको नेपाली युवाहरूको विषयले प्रवेश पाएको हो । नेपाल सरकारका अर्थमन्त्री जनार्दन शर्माले प्रस्तुत गरेको श्वेतपत्रमाथि प्रश्न गर्दै कोरिया भाषा पास गरेका युवाहरूको विषयमा भइरहेको प्रगतिको विषयमा जानकारी माग गरिएको छ ।
सत्तारुढ दल नेकपा माओवादी केन्द्रका सांसद गजेन्द्र बहादुर महतले यस विषयमा अर्थमन्त्रीको जवाफ मागेका हुन् । नेपालमा रोजगार सिर्जना नभएको अवस्थामा कोरिया जान भाषा पास गरेका युवाका विषयमा सरकारले के सोचिरहेको छ ? यस विषयमा जानकारी दिन उनले माग गरेका थिए ।
यसको उत्तर दिँदै अर्थमन्त्री शर्माले सरकारले कोरियासँग सम्वाद र छलफल गरिरहेको बताएका छन् । कोरियाले श्रमिक लिने विषयमा सरकारले बारम्बार छलफल भइरहेको मन्त्री शर्माको भनाइ छ । यस विषयमा केही दिन अघि मात्रै दक्षिण कोरियाको राजदूतसँगको भेटमा पनि कुरा राखिएको मन्त्री शर्माले संसदलाई जानकारी दिएका छन् ।
कोरिया जानका लागि भाषा पास गरेरका ५ हजार र कमिटेड करिब ३ हजारको हाराहारीमा रहेको वैदेशिक रोजगार विभागले जनाएको छ । उनीहरूलाई कोरिया पठाउने व्यवस्था मिलाउनका लागि राष्ट्रियसभाअन्तर्गतको सरकारी आश्वासन समितिले समेत यसअघि नै सरकारलाई निर्देशन दिइसकेको विभागका महानिर्देशक कृष्णप्रसाद दवाडीले जानकारी दिएका थिए ।
