काठमाडौं– संघीय संसदको प्रतिनिधिसभामा वैदेशिक रोजगार सम्बन्धी जरुरी सार्वजकि महत्वको प्रस्ताव दर्ता गरिएको छ । कोरोना भाइरस (कोभिड–१९) को प्रभावका कारण वैदेशिक रोजगार असुरक्षित भएको र सरकारले आवश्यक सहयोग गर्नुपर्नेलगायत विषयमा नेपाली कांग्रेसले प्रतिनिधिसभामा जरुरी सार्वजनिक महत्वको प्रस्ताव दर्ता गराएको हो ।
नेपाली कांग्रेसका सांसद डा.डिला संग्रौला पन्त प्रस्तावक र प्रमिला राई तथा रामबहादुर विष्ट समर्थक भएर जरुरी सार्वजनिक महत्वको प्रस्तावमा दर्ता गराएका हुन् । संसदमा दर्ता गरिएको त्यो प्रस्तावमा कोभिड–१९ बाट उत्पन्न समस्याले वैदेशिक रोजगारमा ज्यान गुमाएका, रोजगारी गुमाएका र स्वदेश फर्किएकाको बारेमा विस्तृत तथ्यांक सरकारसँग माग गर्न छलफल गर्नुपर्ने उल्लेख गरिएको छ ।
कोभिडको कारण मृत्यु भएका व्यक्तिका परिवार तथा रोजगारी गुमाएका व्यक्तिलाई सरकारको तर्फबाट भएको सहयोगको माग गर्न, वैदेशिक रोजगारबाट फर्केका र स्वदेशमै पनि बेरोजगार भएका व्यक्तिलाई सरकारले के कस्तो राहत र रोजगारीको व्यवस्था गरेको सो बारे पनि छलफल गर्न सो प्रस्तावमा माग गरिएको छ ।
त्यस्तै रोजगारीका लागि सम्झौता तथा समझदारी भएका मुलुकमा अनुगमन किन नभएको, अब कुन–कुन देशसँग अनुगमन र श्रम सम्झौता हुँदैछ, त्यसबारे पनि सरकारसँग आवश्यक सूचना माग गरिएको छ ।
