काठमाडौं– वैदेशिक रोजगारीका लागि इजरायल जानका लागि ४ हजार ४ सय ६९ जनाको आवेदन दर्ता भएको छ । वैदेशिक रोजगार विभागले इजरायलको दीर्घकालीन स्याहार केन्द्रमा पठाउनका लागि आवेदन माग गरेअनुसार १३ दिनमा ४ हजार ४ सय ६९ जनाको आवेदन परेको जानकारी दिएको छ । विभागले २१ दिनको समयसीमा तोकेर १२ साउनमा आवेदन माग गरेको थियो । १ हजार जनालाई इजरायल पठाउने गरी परीक्षा सञ्चालन हुने र अहिले आवेदन दर्ताको काम भइरहेको वैदेशिक रोजगार विभागका महानिर्देशक कृष्णप्रसाद दवाडीले बताएका छन् ।
वैदेशिक रोजगार पत्रकार समाजसँगको छलफलमा महानिर्देशक दवाडीले हालसम्म आवेदन दिनेहरूमध्ये १ हजार ९ सय ५२ जना महिला र २ हजार ५ सय १७ जना पुरुष रहेको जानकारी दिए । आवेदन दिएकामध्येबाट परीक्षामा करिब १ हजार ७ सयको हाराहारीमा परीक्षार्थी पास हुने र त्यसबाट मौखिक परीक्षाबाट १ हजार ४ सय जनाको नाम रोस्टरमा राखिने महानिर्देक दवाडीको भनाइ छ । उनका अनुसार परीक्षामा उत्तीर्ण भएकामध्ये पनि ४ सय जना भने इजरायल जान नपाउने उनले बताए । रोजगारीका लागि इजरायल जानेमध्ये ७० प्रतिशत महिला र ३० प्रतिशत पुरुष रहने छन् ।
अंग्रेजी माध्यमबाट हुने परीक्षा पास गरेकाहरूले प्राप्त गरेको अंक भारका आधारमा विभागले ती नामहरूलाई इजरायल पठाउने र उताबाट जसको नाम आउँछ उ रोजगारीका लागि जान पाउने दवाडीको भनाइ छ । यसअघि घरेलु कामदारका रूपमा गएका नेपालीहरू यसपटक भने संगठित संस्थाहरूका रोजगारीका लागि जाने बताइएको छ । इजरायल जाने श्रमिकले तिर्नु पर्ने अनुमानित रकम सार्वजनिक भएको र त्यसमा राहदानी बनाउनेदेखि मेडिकल चेकजाँच र टिकटको मूल्य समावेश गरिएको उनले बताए ।
कोभिड तथा अनलाइन सफ्टवेयर निर्माणलगायत कारणले इजरायलको रोजगारीमा केही ढिलाइ भएको पनि बताइएको छ । जसबाट एक वर्षजस्तो ढिलाइ हुन पुगेको दवाडीले जानकारी दिए । बजारमा प्रमाणपत्र बनाउने हल्लाहरू भइरहेको भन्दै प्रमाणपत्रभन्दा पनि परीक्षामा ल्याएको प्राप्तांकले बढी अर्थ राख्ने उनको धारणा थियो । प्रमाणपत्र भए पनि सीप नभएमा त्यस्तो व्यक्तिलाई रोजगारीमा पठाउन नहुने उनको भनाइ छ । इजरायल रोजगारीमा गएकाहरूले अनुभव लिएर आउने र त्यसलाई प्रयोग गरेर नेपालमा समेत रोजगारी सिर्जना गर्न सक्ने सम्भावना बढी रहेको उनले बताएका छन् । अहिले प्रमाण पत्र कहाँ बनाउन पाइन्छ भन्नेभन्दा पनि सीप सिक्नका लागि युवाहरू अग्रसर हुनु पर्ने उनले बताए । सीप सिकेपछि अहिले नभए पनि अर्कोपटकका लागि इजरायल जान सकिने उनको भनाइ थियो ।
-1745656903.jpeg)