काठमाडौं– रिले अनसन गरिरहेको भूतपूर्व गोर्खाहरूले भोक हड्ताल सुरु गरेका छन् । गोर्खा सत्याग्रह संयुक्त संघर्ष समितिको आह्वानमा २१ जुलाइदेखि रिले अनसन गरिरहेका उनीहरूले शनिबारदेखि भोक हड्ताल सुरु गरेका हुन् ।
बेलायत र नेपाल सरकारबीच वार्ता हुने मिति र उच्चस्तरीय वार्ता समिति बनेपछि मात्र भोक हड्तालको अन्त्य गरिने सत्याग्रह समितिले जनाएको छ । बेलायत सरकारले आफ्ना मागको बेवास्ता गरेको भन्दै बेलायती प्रधानमन्त्रीको कार्यालय अगाडि गोर्खाहरूले रिले अनसन गर्दै आएका थिए । १७ दिनको रिले अनसनपछि पनि बेलायती सरकारबाट कुनै प्रतिक्रिया नआएका कारण भोक हड्तालभन्दा अन्य विकल्प नभएको उनीहरूको भनाइ छ ।
भोक हड्तालमा भुपूगोर्खाहरू ज्ञानराज राई र धनबहादुर गुरुङ एवं गोर्खा एकल महिला पुष्पा राना घले बस्ने यसअघि नै सार्वजनिक भइसकेको छ । १३ जना भिसीको नाममा सुरु गरिएको रिले अनसन कार्यक्रमअन्तर्गत भूपूगोर्खा गुरुङबाट अनसनको पहिलो दिन सुरुआत गरिएको थियो । समान पेन्सनलगायत अधिकारको माग गर्दै गोर्खा सत्याग्रह संयुक्त संघर्ष समितिले बेलायती प्रधानमन्त्री कार्यालय अगाडि पहिलो चरणअन्तर्गतको रिले अनसन सुरु गरेको थियो ।
