काठमाडौं– गैरआवासीय नेपाली संघ (एनआरएनए) युकेको अध्यक्षमा प्रेम गाहा मगर निर्वाचित भएका छन् । शुक्रबार अबेर घोषणा भएको मतपरिणाम अनुसार गाहा मगरले ४ हजार ५७४ मत पाएर अध्यक्षमा निर्वाचित भएका हुन् ।
अध्यक्षका अर्का प्रत्यासी दीपक श्रेष्ठले २ हजार १९१ र रोजिना प्रधान राईले २ हजार १४८ मत प्राप्त गरेका छन् । १८ साउनमा भएको निर्वाचनको मत परिणाम सार्वजनिक गर्न केही ढिलाइ भएको थियो । संघको निर्वाचन १८ साउनमा अनलाइनमार्फत भएको थियो । त्यस्तै संघको उपाध्यक्षमा सुनिलबाबु खड्का र गोविन्द खरेल निर्वाचित भएका छन् । खड्काले ४ हजार १६९ मत ल्याए भने खरेलको पक्षमा ३ हजार ६६५ मत खसेको बताइएको छ । त्यस्तै स्कटल्यान्ड उपाध्यक्षमा मोहनकुमार कार्कीले ४ हजार ५९५ मतसहित विजयी भए । नर्दन आयरल्यान्ड उपाध्यक्षमा नारायण कँडेलले ४ हजार ४९५ मत प्राप्त गर्दै विजय हासिल गरे । महिला उपाध्यक्षमा गाहा मगरको टिमबाट शकुन्तला गुरुङ ३ हजार ७४३ मतसहित निर्वाचित भइन् ।
संघको महासचिवमा खुुसी लिम्बूले ३ हजार ७४७ मत पाए भने उनका प्रतिपष्र्धी जित रानाभाटले २ हजार ६३९ मत प्राप्त गरेको निर्वाचन समितिले जनाएको छ । त्यस्तै सचिवमा विष्णु चालिसे र ज्ञानेन्द्रबहादुर आले, सचिव (महिला) मा नम्रता घले गुरुङ, कोषाध्यक्षमा विष्णु खरेल र सह–कोषाध्यक्षमा शशांक शर्मा निर्वाचित भएका छन् । यसैगरी, युवा संयोजकमा तीर्थबहादुर मल्ल ‘अनिल’ र महिला संयोजकमा विमला लिम्बू विजयी भएको निर्वाचन समितिले जनाएको छ । सदस्यहरूमा बालकृष्ण दाहाल, विशाल राई, चम्पा थापा मगर, चेतबहादुर राना, दीपक सापकोटा, इन्दिरा सपना खनियाँ, पदमबहादुर शाही, उपेन्द्र पौडेल, सुमन शर्मा, सुरेश परियार, भानुभक्त घिमिरे, भीमलाल खनाल निर्वाचित भएका छन् ।
यसैगरी, इंग्ल्यान्ड राज्य समितिको अध्यक्षमा लालबहादुर गुरुङ र स्कटल्यान्ड राज्यसमितिको अध्यक्षमा काशीराम भण्डारी निर्वाचित भएको निर्वाचन समितिले जनाएको छ । वेल्स राज्यसमिति अध्यक्षमा कृष्णप्रसाद भण्डारी र नर्दन आयरल्यान्ड राज्य समितिको अध्यक्ष बलबहादुर थापा यस अघि नै निर्विरोध निर्वाचित भइसकेका थिए । यसअघि नै अन्तर्राष्ट्रिय समन्वय समितिका सदस्यका लागि राजेन्द्र पुडासैनी, महेश अधिकारी, समिर खनाल, भीमलाल भट्टराई, एलएन पाण्डे, कोशलेश्वर ढकाल र दिनेश घिमिरे पनि निर्विरोध निर्वाचित भइसकेको बताइएको छ ।
