काठमाडौं– इजरायल पठाइदिने भन्दै विभिन्न आश्वासन दिनेको फन्दामा नपर्न वैदेशिक रोजगार विभागले आग्रह गरेको छ । । इजरायलमा रोजगारीमा जानका लागि अनिवार्य परीक्षा पास गर्नु पर्ने र पास गरेका व्यक्तिहरूमध्येबाट छनोट भएकाहरू मात्रै जान पाउने भएकाले इजरायल पठाइदिन्छु भन्दै आश्वासन दिनेको विश्वास नगर्न विभागले सूचना प्रकाशन गरेर नै आग्रह गरेको हो ।
रोजगारीका लागि इजरायल जानका लागि नेपाल सरकारले लिने परीक्षामा पास हुनु पर्ने र जाँदा पनि सरकारी रूपमा नै जाने भएकाले यस्ता हल्लाको पछि नलाग्न विभागले बिहीबार सूचना जारी गर्दै सबैलाई सचेत गराएको छ । सूचनाअनुसार इजरायलमा केयर गिभर कामका लागि छनोट गरी पठाउन नेपाल सरकारसँग इजरायल सरकारको सम्झौता गरेअनुसार हुने भन्दै सामाजिक सञ्जालमा आवेदन दिने व्यक्तिलाई प्रलोभनमा पार्ने किसिमका भ्रम फैलाइएको भन्दै विभागको ध्यानाकर्षण भएको भनिएको छ ।
पछिल्लो समय म्यानपावर कम्पनी, कन्सलन्टेन्सी, एजेन्सीलगायत व्यक्तिगत तवरमा पनि इजरायल पठाइदिन्छु भन्दै रकमसमेत असुल्ने गरेको पाइएको भन्दै यसबारे सबैलाई सचेत हुन विभागले अनुरोध गरेको छ । इजरायलको रोजगारी जिटुजीमार्फत अर्थात नेपाल सरकार र इजरायल सरकाबीचको सम्झौताअनुसार हुने भएकाले यसमा कुनै पनि निजी संस्था आबद्ध नरहेकाले त्यस्तो प्रलोभनमा नपर्न विभागले सूचित गरेको हो । इजरायलको केयर गिभरको क्षेत्रमा रोजगारीका लागि विभागले आवेदन माग गरिसकेको छ । आवेदन माग भएको २१ दिनभित्र वैदेशिक रोजगार विभागको वेबसाइटमा गएर अनलाइनबाटै आवेदन दिन सकिने विभागले जनाएको छ ।
इजरायलमा रोजगारीका लागि जान इच्छुक व्यक्तिहरूले अंग्रेजी भाषाको परीक्षा उत्तीर्ण हुनु पर्ने र लिखित परीक्षामा पास भएहरूमध्येबाट मौखिक परीक्षामा बोलाइने विभागले जनाएको छ । मौखिक परीक्षामा समेत छनोट भएपछि रोस्टरमा नाम समावेश गरी कामदार छनोटका लागि इजरायल पठाइने र कामदार छनोट प्रक्रिया पूर्णरूपमा निष्पक्ष हुने विभागले स्पष्ट पारेको छ ।
-1745656903.jpeg)