काठमाडौं– वैदेशिक रोजगारका लागि इजरायल आवेदन दिने वेब सर्भरमा देखिएको समस्या समाधान भएको छ । सोमबारदेखि अनलाइन वेब सर्भरमा देखिएको पावर मर्मतपछि मंगलबारदेखि सुचारु भएको हो ।
सोमबारदेखि राष्ट्रिय सूचना प्रविधि केन्द्रअन्तर्गतको जिआइडिसीमा पावर फेलियर हुँदा इजरायल रोजगारीका लागि आवेदन दिने सर्भरमा समस्या आएको थियो । उक्त प्रणालीमा सोमबार बिहान १ बजेदेखि समस्या आउनुभन्दा अघिसम्म दर्ता भएका विवरण प्राविधिक कारणवश रिकभर गर्न नसकिने भएको छ । रिकभर गर्न नसकिने भएकाले निवेदन दिइसकेकाहरूले पनि प्रणालीमा आफ्नो युजर आइडी ( राहदानी नम्बर र पासवर्ड प्रयोग गरी विवरण रुजु गर्न विभागले आग्रह गरेको छ । यसरी रुजु गर्दा नभेटिएमा पुनः नयाँ दर्ता गर्न पनि विभागले अनुरोध गरेको छ । साथै नयाँ दर्ता गर्दा प्राप्त हुने रजिस्ट्रेसन नम्बर नै निवेदकको रजिष्ट्रेशन नम्बर कायम हुने विभागले जनाएको छ ।
इजरायलको दीर्घकालीन स्याहार केन्द्रमा सहायक कामदार पठाउन विभागले १२ साउनमा २१ दिनको सूचना निकालेको थियो । जसका लागि आवश्यक योग्यता पुगेका नेपाली नागरिकले अनलाइनमार्फत निवेदन दिन मिल्ने व्यवस्था गरेको थियो ।
