काठमाडौं– युनाइटेड अरब इमिरेट्स (युएई)को ‘भ्यालिड रेसिडेन्सी भिसा’ (वैधानिक बसोबासको प्रवेशाज्ञा) भएकाहरू त्यहाँ जान पाउने भएका छन् । युएई सरकारले नेपालसहित ६ देशका नागरिकहरू आउँदो ५ अगस्ट अर्थात २१ साउनदेखि युएई प्रवेश गर्न दिने निर्णय गरेको हो । खोप लगाएका भ्यालिड रेसिडेन्सी भिसा भएका नेपाली नागरिकसहित ६ देशका नागरिकलाई प्रवेश अनुमति दिने निर्णय गरिएको युएईका स्थानीय सञ्चारमाध्यमले जनाएका छन् ।
युएईको ‘जनरल सिभिल एभियसन अथोरिटी’ र ‘नेसनल इमर्जेन्सी क्राइसिस् एन्ड डिसास्टर म्यानेजमेन्ट अथोरिटी’ले मंगलबार यस्तो निर्णय गरेको समाचारमा जनाइएको छ । कोरोना संक्रमण रोकथामका लागि युएईले नेपालसहित, भारत पाकिस्तान, श्रीलंकालगायत देशबाट आउने यात्रुमाथि प्रतिबन्ध लगाएको थियो ।
अब ५ अगस्टदेखि नेपाल, भारत, श्रीलंका, पाकिस्तान, नाइजेरिया र युगान्डाका नागरिक युएई प्रवेश गर्न पाउने भएका हुन् । कोरोनाविरुद्धको खोप लगाएका ‘भ्यालिड रेसिडेन्सी भिसा’ भएकाहरू युएई प्रवेश गर्न पाउने बताइएको छ । युएईले मोर्डना, फाइजर, बायोएनटेक, स्पुतनिक भी, अक्फोर्ड, अस्ट्राजेनेका र सिनोफर्मा (भेरोसेल) खोपलाई मान्यता दिएको छ । नेपालबाट पनि भेरोसेल खोपको दुवै मात्रा लगाएको र भ्यालिड रेसिडेन्सी भिसा भएकाहरूले युएई प्रवेश पाउने बताइएको छ ।
-1745656903.jpeg)