काठमाडौं– वैदेशिक रोजगारको लागि दक्षिण कोरिया जान नपाएका श्रमिकलाई तत्काल त्यहाँ पठाउन संसदीय समितिले सरकारलाई निर्देशन दिएको छ । आइतबार संघीय संसद राष्ट्रियसभा अन्तर्गतको प्रत्यायोजित व्यवस्थापन तथा सरकारी आश्वासन समितिको बैठकले भाषा पास गरेका श्रमिकलाई तत्काल कोरिया पठाउने निर्देशन दिएको हो ।
सिंहदरबारमा बसेको समितिको बैठकले इपिएस परीक्षा पास गरेर बसेका श्रमिकलाई दक्षिण कोरिया पठाउन प्रधानमन्त्री तथा मन्त्रिपरिषद् कार्यालय, श्रम, रोजगार तथा सामाजिक सुरक्षा मन्त्रालय, परराष्ट्र मन्त्रालय र स्वास्थ्य तथा जनसंख्या मन्त्रालयलाई निर्देशन दिएको जनाइएको छ । इपिएस परीक्षा पास गरेर बसेका करिब १० हजार श्रमिकले दक्षिण कोरिया पठाउने काममा सरकारले आलटाल गरेको भन्दै समितिमा उजुरी दिएका थिए । त्यही उजुरीको सुनुवाइ गर्दै सम्बन्धित मन्त्रालयसँग छलफल गरी आवश्यक प्रक्रिया पूरा गरी तत्काल उनीहरूलाई दक्षिण कोरिया पठाउन निर्देशन दिइएको समितिका सभापति रामनारायण बिडारीले जानकारी दिएका छन् ।
बैठकमा इपिएस परीक्षा पास गरेका श्रमिकहरूलाई समेत दक्षिण कोरिया पठाउने काममा आलटाल गरेको भन्दै समितिका सदस्यहरूले सरकारको चर्को आलोचना गरेका थिए । समितिका सदस्य खिमलाल देवकोटाले सबै प्रक्रिया पूरा गरेका श्रमिकलाई अझै दक्षिण कोरिया नपठाएर सरकारले निर्लज्जता प्रकट गरेको भन्दै आपत्ति जनाएका थिए । त्यसैगरी, समितिका अर्का सदस्य राधेश्याम अधिकारीले उडान, खोपलगायत व्यवस्था पनि गरी भाषा पास गरेका श्रमिकलाई कोरिया पठाउने व्यवस्था गर्नु पर्ने बताएका छन् ।
समितिका सदस्यहरूले उठाएका प्रश्नको जवाफ दिँदै मुख्य सचिव शंकरदास बैरागीले आवश्यक प्रक्रिया पूरा गरी इपिएस परीक्षा पास गरेकाहरूलाई छिटो दक्षिण कोरिया पठाउन समन्वयकारी भूमिका निर्वाह गर्ने प्रतिबद्धता व्यक्त गरेका छन् ।
