काठमाडौं– वैदेशिक रोजगारीका लागि विदेशमा गएका १ सय ४० जनाले आत्महत्या गरेका छन् । आर्थिक वर्ष ०७७÷७८ मा विदेशमा ज्यान गुमाएका १ हजार २ सय ४२ जनामध्ये १ सय ४० जनाले आत्महत्या गरेको वैदेशिक रोजगार बोर्डको तथ्यांकले देखाएको हो ।
रोजगारीका लागि गएका नेपाली युवाहरू विश्वका २७ वटा देशमा मृत्यु भएका श्रमिकमध्ये १ सय ४० जनाले आत्महत्या गरेको बोर्डले सार्वजनिक गरेको तथ्यांकमा देखिएको छ । विदेशमा मृत्यु हुनेमध्ये सबैभन्दा धेरै विभिन्न किसिमका रोगका कारण मृत्यु भएको तथ्यांकले देखाएको हो । विभिन्न प्रकारका रोगका कारण विदेशमा कार्यरत २ सय २७ जना नेपाली श्रमिकको मृत्यु भएको छ । जसमध्ये ४ सय ११ जना पुरुष र १६ जना महिला रहेको बोर्डले जनाएको छ । विदेशमा रोजगारका लागि गएका युवाहरूमध्ये सबैभन्दा बढी साउदी अरबमा ३ सय ६२ जनाले ज्यान गुमाएको तथ्यांक रहेको छ ।
विदेशमा मृत्यु भएकाहरूमध्ये सडक दुर्घटनामा परी ज्यान गुमाउनेको संख्या १ सय १९ जना रहेका छन् । जसमध्ये ३ जना महिला र बाँकी पुरुष रहेको बोर्डले जारी गरेको तथ्यांकमा देखिएको छ । त्यस्तै कार्यस्थलमा भएको दुर्घटनामा परेर मृत्यु हुनेको संख्या भने २६ जना रहेको बोर्डले जनाएको छ । त्यस्तै प्राकृतिक मृत्यु भएका नेपालीको संख्या १ सय ७१ जना रहेको छ । विदेशमा हत्या भएका नेपालीको संख्या २ जना रहेको तथ्यांकमा देखिएको छ । त्यस्तै अन्य विविध कारणले गर्दा २ सय ४८ जनाले ज्यान गुमाएका छन् ।
कोरोनाले ३९ जनाको मृत्यु
यसैबीच, विश्वव्यापी महामारीका रूपमा फैलिएको कोरोना भाइरस (कोभिड–१९) का कारण विदेशमा कार्यरत थप ३९ जना नेपालीको मृत्यु भएको छ । कोरोनाका कारण पछिल्लो ३ हप्ताको अवधिमा ३९ जनाको मृत्यु भएको तथ्यांक गैरआवासीय नेपाली संघ (एनआरएनए) ले सार्वजनिक गरेको हो ।
एनआरएनएले सार्वजनिक गरेको तथ्यांकअनुसार यो अवधिमा मलेसियामा मात्रै ३७ जनाको मृत्यु भएको बताइएको छ । त्यस्तै बाँकी १–१ जना इराक र युगान्डामा रहेका नेपालीको मृत्यु भएको छ । इराकमा कोरोनाका कारण नेपालीको मृत्यु भएको यो पहिलोपटक भएको बताइएको छ । योसँगै कोरोनाका कारण विदेशमा ज्यान गुमाउनेको संख्या ४ सय ८६ जना पुगेको छ । हालसम्म विश्वभरका २९ वटा मुलुकमा रहेका नेपालीले ज्यान गुमाएको एनआरएनएले जनाएको छ ।
संघको स्वास्थ्य समितिका अनुसार अहिलेसम्म विदेशमा ५४ देशमा रहेका १ लाख २७ हजार ९ सय ३४ जना नेपालीमा कोरोना संक्रमण पुष्टि भएको छ । तीमध्ये १ लाख १७ हजार ५ सय २९ जना नेपाली कोरोना संक्रमणमुक्त भएका छन् । स्वास्थ्य समितिका संयोजक डा.संजिव सापकोटाका अनुसार अहिलेसम्म विदेशमा कोरोना संक्रमणबाट ९१ दशमलव ८६ प्रतिशत नेपाली संक्रमणमुक्त भएका छन् । पछिल्लो समय मलेसिया र भारतमा रहेका नेपालीमा थप कोरोना संक्रमण देखिएको एनआरएनएले जनाएको छ ।
-1745656903.jpeg)