काठमाडौं– वैदेशिक रोजगार विभाग अन्तर्गतको इपिएस शाखा कोरियाले हल्लाको पछि नलाग्न आग्रह गरेको छ । पछिल्लो समय दक्षिण कोरियाको रोजगारका विषयमा सामाजिक सञ्जालमा भ्रामक समाचारहरू आएको भन्दै त्यस्तो हल्लाको पछि नलाग्न शाखाले अनुरोध गरेको हो ।
बुधबार एक सूचना जारी गर्दै सामाजिक सञ्जालमा केही व्यक्तिहरूले कोरिया रोजगारीका विषयमा भ्रमपूर्ण समाचार सम्प्रेषण गर्ने, कार्यालयका कर्मचारीहरूप्रति गालीगलौज गर्ने कार्य प्रति शाखाले खेद् प्रकट गरेको छ । साथै, यस्ता उच्छृंखल, अमर्यादित क्रियाकलापले प्रणालीलाई नै नकरात्मक असर पर्न सक्ने भएकाले यस्ता नगर्न÷नगराउन पनि शाखाले आग्रह गरेको छ ।
यस्ता गलत, तथ्यहीन समाचारले शाखाको गम्भीर ध्यानकर्षण गरेको भन्दै यस्तो समाचारको पछि नलाग्न सबैलाई सचेत गराएको छ । पछिल्लो समय दक्षिण कोरिया रोजगारीको प्रक्रिया सुरु हुने सम्बन्धमा सामाजिक सञ्जालमा विभिन्न भ्रमपूर्ण समाचारहरू सेयर गर्ने र कार्यालयका कर्मचारीलाई समेत गाली गलौज गर्ने गरेको भन्दै शाखाले यस्तो कार्यले इपिएस प्रणालीलाई नकारात्मक असर गर्ने भन्दै यस्तो कार्य नगर्न सबैलाई अुनरोध गरेको हो । रोजगारका लागि कोरिया जाने श्रमिकहरूलाई धर्य गर्न भन्दै अनाधिकृत सूचनाको विश्वास नगर्नसमेत सूचनामार्फत सबैलाई आग्रह गरेको छ ।
कोरोना महामारीको समयमा पनि कोरिया सरकारले तोकेका मापदण्ड पूरा गरी श्रमिक पठाउने विषयमा निरन्तर छलफलसमेत भइरहेको सूचनामा भनिएको छ । कोरोना महामारीका कारण भएको निषेधाज्ञा, अन्तर्राष्ट्रिय उडान बन्दलगायत कारण दक्षिण कोरियामा नियमित तथा कमिटेड व्यक्तिहरूको उडान प्रक्रिया रोकिएको पनि शाखाले जनाएको छ । अहिले नेपाल सरकारले सबै उडानहरू खुलाए पनि कोरोना संक्रमण बढिरहेका कारण पनि कोरिया जाने विषयमा ढिलाइ भएको बताइएको छ । अहिलेको समयमा कोरिया सरकारले नेपाली श्रमिक भित्याउन पनि रोक लगाएको छ । तर पछिल्लोपटक विभिन्न प्रयास पछि विभिन्न सर्तसहित नेपाली श्रमिक लैजान दक्षिण कोरिया सरकार राजी देखिएको पनि सूचनामा भनिएको छ ।
कोरियाले नियमित सिधा उडान हुनुपर्ने, कोरोना बिमा हुनुपर्नेलगायत सर्त राखेको छ । जसअनुसार नेपालले यी प्रक्रिया पूरा गर्न तयार रहेको जानकारी पनि कोरिया सरकारलाई दिइसकेको इपिएस शाखाले जनाएको छ । कोरियाको रोग नियन्त्रण महाशाखाको विभिन्न स्वास्थ्यका मापदण्डलगायत सर्त पालना गरी श्रमिक लैजान प्रयास भइरहेको र कोरिया सरकारले पनि जानकारी दिइसकेको बताइएको छ । सूचनामा अहिलेसम्म इपिएर प्रणालीमार्फत ६५ हजारभन्दा बढी नेपाली श्रमिक रोजगारका लागि भएको र अहिले कोरियाका रोजगारदाताको उच्च प्राथमिकतामा नेपाली श्रमिक पर्न सफल भएको भनिएको छ ।
यसैबीच, नेपालका लागि दक्षिण कोरियाका राजदूत पार्क चोङ सकले अर्थमन्त्री जनार्दन शर्मासँग शिष्टाचार भेट गरेका छन् । बुधबार अर्थ मन्त्रालयमा भएको भेटमा अर्थमन्त्री शर्माले भाषा परीक्षा उत्तीर्ण गरी कोरिया जान नपाएका युवाहरूलाई काम गर्ने वातावरण बनाइदिन आग्रह गरेका छन् । कोभिड महामारीका कारण रोकिएको प्रक्रिया चाँडै अघि बढाउन सरकारको तर्फबाट गर्नु पर्ने कार्य गर्न तयार रहेको भन्दै मन्त्री शर्माले कोरियाका तर्फबाट गर्नु पर्ने प्रक्रिया अघि बढाइदिन आग्रह गरेका छन् ।
जवाफमा राजदूत पार्कले रोकिएको इपिएसको काम अघि बढाउन आफूले पहल गर्ने प्रतिबद्धता व्यक्त गरेका छन् । नेपालीहरूको मेहनत र इमानदारिताबाट कोरियाली रोजगारदाताहरू खुसी रहेको भन्दै राजदूत पार्कले भाषा परीक्षा उत्तीर्ण गरी पालोमा बसेका श्रमिकहरूलाई काममा पठाउने प्रक्रिया अघि बढाइने जानकारी दिएको बताइएको छ ।
-1745656903.jpeg)