काठमाडौं– वैदेशिक रोजगारका लागि नेपालबाट तत्कालका लागि १ हजार जना श्रमिक इजरायल जान पाउने भएका छन् । इजरायलको दीर्घकालीन स्याहार सेवा केन्द्रमा सहयोगीका रूपमा उनीहरू इजरायल जान पाउने भएका हुन् ।
इजरायलमा रोजगार गर्न जाने इच्छुकहरूलाई आवेदन दिन वैदेशिक रोजगार विभागले मंगलबार सूचना नै जारी गरेको छ । अबको २१ दिनभित्र इच्छुक व्यक्तिले निवेदन दिन सक्ने बताइएको छ । आकर्षक गन्तव्यका रूपमा हेरिएको इजरायल जानका लागि इच्छुक नेपाली युवाले विभागको वेबसाइटमा गएर आवेदन दिन सक्ने विभागले जारी गरेको सूचनामा भनिएको छ । इजरायल जानका लागि २५ वर्ष पूरा भएर ४५ वर्ष ननाघेको हुनु पर्ने विभागले जनाएको छ । रोजगारीका लागि इजरायल जाने १ हजार जनामध्ये ७० प्रतिशत महिला र ३० प्रतिशत पुरुष श्रमिकले इजरायल जान पाउने भएका हुन् ।
इजरायल जान चाहनेले त्यहाँ जानका लागि लाग्ने खर्च भने आफैँले व्यहोर्नु पर्ने जनाइएको छ । यसका लागि १ ल्ँँख ६५ हजार रूपैयाँ लाग्ने पनि सूचनामा नै उल्लेख गरिएको छ । इजरायल जाने श्रमिकको न्यूनतम् तलब १ हजार ६ सय अमेरिकी डलर (झन्डै १ लाख ९० हजार नेपाली रूपैयाँ) हुने बताइएको छ । सूचनाअनुसार सरकारी संयन्त्र (जिटुजी) प्रणालीबाट इजरायलमा कामदार पठाइने छ । इजरायल जाने श्रमिकको सुरुमा करार अवधि १ वर्षको हुने र थप हुने विकल्पसहित ५ वर्षको करार अवधि हुने विभागले जनाएको छ ।
इजरायललाई कमाइ र कार्यस्थलको हिसाबले दक्षिण कोरियाभन्दा पनि आकर्षक श्रम गन्तव्यका रूपमा हेरिएको छ । इजरायलमा श्रमिक पठाउने विषयमा मन्त्रिपरिषद्को बैठकले नेपाली कामदार पठाउनेसम्बन्धी निर्देशिकालाई पारित गरेपछि विभागले कामदार पठाउने प्रक्रिया सुरु गरेको हो । निजी क्षेत्रको संलग्नतामा कामदार भर्ना गर्दा कामदारमाथि ठूलो आर्थिक शोषण भएको भन्दै नेपाल र इजरायलबीच गत ३० सेप्टेम्बरमा जिटुजीमार्फत नै श्रमिक लैजाने विषयमा श्रम सम्झौता भएको थियो । इजरायल जाने श्रमिक छनोट र भर्ना प्रक्रियामा नेपालको तर्फबाट वैदेशिक रोजगार विभाग र इजरायलको तर्फबाट पपुलेसन एन्ड इमिग्रेसन अथोरिटी (पिआइबिए) ले गर्ने बताइएको छ । वैदेशिक रोजगार विभागले इजरायल हेर्ने छुट्टै संयन्त्र बनाएर नै काम गरिरहेको विभागका निर्देशक तथा सूचना अधिकारी महन्द्रनाथ भट्टराइले बताएका छन् ।
इजरायल जाने श्रमिकले हप्तामा ७ दिन दैनिक ८ घन्टा काम गर्नु पर्ने छ । त्यहाँ जाने श्रमिकले खाना खर्च आफैँले व्यहोर्नु पर्ने छ भने बस्नका लागि रोजगारदाताले विदेशी कामदार सम्बन्धी नियमअनुसार सुरक्षित र स्वस्थ्य आवासको व्यावस्था हुने बताइएको छ । इजरायल जाने श्रमिकको उचाइँ १.५ मिटर र ४५ किलोग्राम तौल हुनु पर्नेछ ।
त्यस्तै कम्तीमा १० कक्षा उत्तीर्ण गरी अनमी वा सिएमएसम्बन्धी विषयको कम्तीमा १५ महिनाको अध्ययन पूरा गरेको वा कक्षा १२ वा सो सरहको शैक्षिक योग्यता हासिल गरी नेपाल सरकारबाट मान्यता प्राप्त तालिम प्रदायक संस्थाबाट केयरगिभिङ सम्बन्धी ३ महिनाको तामिल प्राप्त गरेको व्यक्ति उम्मेदवार हुन पाउने विभागले जनाएको छ ।
-1752335779.jpg)
