काठमाडौं– वैदेशिक रोजगारीमा ज्यान गुमाएका र पूर्ण रूपमा असक्त वा गम्भीर बिरामी भएकाहरूका सन्तानलाई छात्रवृत्ति प्रदानका लागि आवेदन माग गरिएको छ । वैदेशिक रोजगार बोर्डले सोमबार सूचना जारी गरेर छात्रवृत्तिका लागि निवेदन दिन आग्रह गरेको हो ।
छात्रवृत्ति पाउनका लागि रोजगारीका लागि श्रम स्वीकृति लिएर करार अवधिभित्र मृत्यु भएको वा गम्भीर बिरामी भएकाहरूका सन्तानले मात्रै छात्रवृत्ति पाउने बोर्डले जनाएको छ । त्यस्ता श्रमिकका छोराछोरीले अध्ययन गरिरहेको शैक्षिक संस्थामा वैदेशिक रोजगार छात्रवृत्ति सञ्चालन कार्यविधि, ०७१ को अनुसूची १ बमोजिमको ढाँचामा ०७८ को असोज मसान्तसम्म निवेदन दिन सकिने बताइएको छ । छात्रवृत्ति पाउनका लागि विदेशमा मृत्यु भएका र पूर्ण अपांगता भएर वैदेशिक रोजगार बोर्डबाट सत प्रतिशत आर्थिक सहायता लिएको परिवारका सन्तान हुनु पर्ने बोर्डले जनाएको छ ।
यस्ता परिवारका सन्तानले पूर्वप्राथमिक कक्षादेखि कक्षा १२ सम्म अध्ययन गर्ने र १८ वर्ष पूरा नगरेका बच्चाहरूलाई छात्रवृत्ति प्रदान गरिने बोर्डले जारी गरेको सूचनामा उल्लेख गरिएको छ । साथै साउन महिनासम्म बोर्डबाट आर्थिक सहायता प्राप्त गरेका श्रमिकका बच्चालाई मात्रै यो कार्यक्रममा समावेश गराइने जनाइएको छ । निवेदन दिनका लागि हालसम्म छात्रवृत्ति नपाएकाहरूका लागि श्रमिकको श्रम स्वीकृतिको निस्सा (स्टिकर) को प्रतिलिपि, निवेदकको संरक्षकको नागरिकताको प्रतिलिपि, विदेशमा मृत्यु भएका श्रमिकको मृत्युदर्ताको प्रमाणपत्रको प्रतिलिपि, बोर्डबाट आर्थिक सहायता प्राप्त गरेको प्रमाणित हुने श्रमिकको राहदानीको प्रतिलिपि र राहादानी नम्बर समावेश गर्नु पर्ने भएको छ ।
त्यस्तै अशक्त भएका श्रमिकहरूका सन्तानको हकमा पूर्ण अशक्त भएको खुल्ने प्रमाण, विद्यार्थीको जन्म दर्ताको प्रतिलिपि, निवेदक, संरक्षक र श्रमिकबीचको नाता प्रमाणणित पत्रको प्रतिलिपि र सम्बन्धित स्थानीय तहको सिफारिस समावेश गर्नु पर्ने जनाएको छ । त्यस्तै छात्रवृत्ति प्राप्त गरिरहेका विद्यार्थीको हकमा भने विद्यार्थीको निवेदन, अध्ययनरत विद्यालयको कक्षा खुल्ने प्रमाण पेस गर्नुपर्ने सूचनामा भनिएको छ ।
बोर्डले आधारभूत तहमा अध्ययन गर्ने विद्यार्थीले वार्षिक ८ हजार, माध्यामिक तहमा अध्ययनरतलाई १२ हजार रूपैयाँ प्रदान गरिने बताइएको छ । एक जना विद्यार्थीलाई एउटा कक्षामा एकपटकका लागि मात्र वार्षिक एकमुष्ट रकम उपलब्ध गराइने बोर्डले जनाएको छ ।
