काठमाडौं– शनिबार त्रिभुवन अन्तर्राष्ट्रिय विमानस्थलमा आँसुको भेल बग्यो । रोजगारीका लागि मलेसिया गएर उतै ज्यान गुमाएका २४ शव नेपाल ल्याइएपछि उनीहरूका आफन्तको आँसुले विमानस्थल स्तब्ध देखिन्थ्यो ।
जन्मेपछि मृत्यु अवश्य छ तर आफ्नो देशमा रोजगारी नभएपछि घरको चुल्हो बाल्न वैदेशिक रोजगार जाँदा उतै मृत्युवरण गर्नेको आफन्तको पीडा शब्दमा लेखिन नसक्ने शनिबारको दृष्य स्पष्ट देखाइरहेको थियो ।
शनिबार राष्ट्रिय ध्वजाबाहक नेपाल वायु सेवा निगमको विमानले मलेसियाबाट २४ वटा नेपालीको शव नेपाल ल्याएपछि विमानस्थलमा स–साना बालबालिकादेखि झन्डै ७५ वर्षसम्मका आफन्तको आँसुले जोसुकैलाई पनि स्तब्ध बनाएको थियो ।
वैदेशिक रोजगार बोर्डको अनुसार समन्वयमा निगमको वाइडबडी ए ३३० विमानले मलेसियाको राजधानी क्वालालम्पुरबाट एकैपटक २४ वटा शव र ३ वटा अस्तु नेपाल ल्याइएको हो । बोर्डको समन्वयमा नेपाल ल्याइएका ती शव शनिबार नै आफन्तलाई जिम्मा लगाइएको बताइएको छ ।
शनिबार ल्याइएका शवहरूमा सल्यानका बुद्धिराम कामी, बर्दियाका मनीराम चौधरी, बैतडीका कर्णबहादुर बुढाथोकी, बाग्लुङका सन्दीप विक, प्रमोद विक र सुनील बिस रहेको शव रहेको छ । त्यस्तै तनहुँका झापटबहादुर थापा, पाँचथरका दलबहादुर मोक्तान, ललितपुरका कृष्णकुमार राईको शव नेपाल ल्याएको छ ।
त्यस्तै सुनसरीका होमबहादुर गुरुङ, बाराका रामचरित्र कानु, सिन्धुपाल्चोकका अमरबहादुर माझी, दैलेखका लोकबहादुर शाहीको शव पनि शनिबार नेपाल ल्याइएको छ । सिरहाका रूपेश पुलामी मगर, कपिलवस्तुका श्यामु थारु, औललढुंगाका सोमरबहादुर तामाङ र दलमान तामाङ, झापाका शम्भु विक, मोरङका कमलादेवी भण्डारी, झापाकै लोकबन्धु लावती, नवलपरासीका मति तामाङको पनि शव नेपाल ल्याइएको छ । त्यस्तै पाल्पाका यमबहादुर सनारी र झापाका गोविन्द बोहोरोको शव पनि नेपाल ल्याइएको छ ।
त्यस्तै नवलपरासीका मोहनप्रसाद चौधरी, डढेलधुराका मीन बहादुर विष्ट र सिरहाका रोशनकुमार यादवको अस्तु नेपाल ल्याइएको छ ।
यसैबीच, नपाल एअरलाइन्सका सिनियर क्याप्टेन विजय लामाले विदेशमा श्रम र पसिना बेच्न गएका नेपाली दाजुभाइ दिदीबहिनीको शव ल्याउनका लागि उडान भर्दा निकै पीडा हुने बताएका छन् । शनिबार मेलेसियाबा २४ शव ल्याएपछि क्याप्टेन लामाले सामाजिक सञ्जाल फेसबुकमा शव ल्याउँदा जस्तो दुःख, पीडा अरु कुनै पनि उडान गर्दा नहुने बताएका हुन् । १७ जुलाई अर्थात गएको शनिबार १२ वटा, बुधबार एउटा र शनिबार २४ वटा गरी एक हप्ताभित्रै ३७ वटा शव र ३ वटा अस्तु विदेशबाट नेपाल ल्याएको र अझै १८ वटा लिन जानुपर्नेछ भन्दै लामाले यस्तो संख्या सरकारका लागि तथ्यांकमा मात्रै सिमित भए पनि मृतक व्यक्तिका आश्रित परिवारको सर्वस्व गुमेको उल्लेख गरेका छन् ।
यस्तै फेसबुकमार्फत नै क्याप्टेन लामाले देशमा राजनीतिक खिचातानी छाडेर युवाहरूलाई श्रम र पसिना बेच्न विदेश जानुपर्ने बाध्यता हटाउन नेपालका राजनीति दल र नेतासँग आग्रह पनि गरेका छन् ।
