काठमाडौं– साउदी अरबमा कोरोना भाइरस (कोभिड–१९) विरुद्धको खोप नलगाएका व्यक्तिहरू सार्वजनिक स्थलमा जान नपाउने भएका छन् । साउदीमा आउँदो १ अगस्टदेखि खोप नलगाएकाहरू सार्वजनिक स्थलमा जान नपाउने भएका हुन् ।
साउदी अरबको नगरपालिका तथा ग्रामीण मामिला मन्त्रालयले सूचना जारी गरेर १ अगस्टदेखि खोप नलगाएका व्यक्तिलाई सपिङ मल, बजार, रिटेल पसललगायत क्षेत्रमा जान प्रतिबन्ध लगाइने जनाएको हो । त्यस्तै ब्युटिपार्लर, वैवाहिक समारोह तथा पार्टी हल, रेस्टुरेन्ट, पुरुष सैलुनमा जानका लागि खोप लगाएको प्रमाण देखाउनुपर्ने मन्त्रालयले जनाएको छ । साउदी सरकारले कोरोना महामारी रोकथाम र नियन्त्रणका लागि पछिल्लो समय कडाइ गरिरहेको स्थानीय सञ्चार माध्यामहरूले जनाएका छन् ।
यसपालीको हजमा पनि साउदीले आफ्ना देशका ६० हजार नागरिकलाई मात्र अनुमति दिएको थियो । हज जाने यात्रीका लागि कोरोनाविरुद्धको दुवै खोप अनिवार्य गरिएको थियो ।
यसैबीच, साउदी अरब जाने नेपालीहरूले जोन्सन एन्ड जोन्सन खोप लगाएर जाँदा संस्थागत क्वारेन्टाइन बस्नु नपर्ने भएको छ । खोप लगाएको १४ दिनपछि साउदी जाँदा त्यहाँ गएर संस्थागत क्वारेन्टान बस्न नपर्ने साउदीमा रहेको नेपाली दूतावासले जनाएको छ । साउदीले फाइजर, अस्ट्राजिनेका, मोडेर्ना र जोन्सन एन्ड जोन्सनको खोपलाई मान्यता दिएको छ । मान्यता दिएका यी खोप लगाएर साउदी जाँदा क्वारेन्टाइनमा बस्नु नपर्ने दूतावासले जनाएको छ ।
साउदी जानेले टिकट काट्दा एयरलाइन्स र ट्राभल एजेन्सीलाई यो कुराको जानकारी गराउन दूतावासले अनुरोध गरेको छ । यसका साथै कोरोना संक्रमण भएर निको भएको ६ महिना नकटेको अवस्थामा पनि साउदी पुगेपछि संस्थागत क्वारेन्टाइन बस्नु नपर्ने दूतावासले जारी गरेको सूचनामा भनिएको छ । अहिले नेपाल सरकारले खोप अनिवार्य गरिएका देशमा वैदेशिक रोजगारीमा जाने श्रमिकलाई जोन्सन एन्ड जोन्सन खोप लगाइरहेको छ । पासपोर्ट र भिसा लिएर खोप केन्द्रमा गएर खोप लगाउन सकिने स्वास्थ्य तथा जनसंख्या मन्त्रालयले जनाएको छ ।
