काठमाडौं– गत आर्थिक वर्ष ०७७/७८ मा वैदेशिक रोजगारमा जानेको संख्यामा भारी गिरावट आएको छ । कोरोनाका कारण अघिल्लो आर्थिक वर्ष ०७६/७७ को तुलनामा गत आर्थिक वर्षमा वैदेशिक रोजगारीमा जाने श्रमिकको संख्यामा आधाभन्दा बढीले कमी आएको हो ।
आर्थिक वर्ष ०७६/७७ मा नेपालबाट मुख्य श्रम गन्तव्य मुलुकमा ३ लाख ६८ हजार ४ सय १३ जना वैदेशिक रोजगारीमा गएका थिए भने गत आर्थिक वर्षमा यो संख्या १ लाख ६६ हजार ३ सय ५ जनामा सिमित भएको छ । गत आर्थिक वर्षमा नेपालीहरूको प्रमुख श्रम गन्तव्य मुलुक युएई, कतार, मलेसिया, साउदी अरब, बहराइन, कुवेत र ओमानमा रोजगारका लागि जाने नेपाली श्रमिकको संख्यामा गिरावट आएको हो । गत आर्थिक वर्षमा वैदेशिक रोजगारका लागि कतार जाने श्रमिकको संख्यामा २६ हजार ८ सय ४२ जनाले कमी आएको छ । अघिल्लो आर्थिक वर्षमा ८१ हजार ५ सय ६७ जना रोजगारीका लागि कतार गएका थिए भने गत आर्थिक वर्षमा यो संख्या ५४ हजार ७ सय २५ रहेको छ । आर्थिक वर्ष ०७५/७६ मा भने रोजगारका लागि कतार जाने नेपालीको संख्या १ लाख ६१ हजार २ सय १२ जना रहेको थियो ।
त्यस्तै नेपालीको अर्को श्रम गन्तव्य मुलुक साउदी अरबमा पनि गत आर्थिक वर्षमा रोजगारका लागि जाने नेपालीको संख्यामा भारी गिरावट आएको वैदेशिक रोजगार विभागले जनाएको छ । विभागका अनुसार अघिल्लो आर्थिक वर्षमा ८३ हजार १ सय ६३ जना साउदी गएका थिए भने गत आर्थिक वर्षमा ४६ हजार ७ सय ९६ जना साउदीका लागि गएका छन् । त्यस्तै अर्को श्रम गन्तव्य मुलुक मलेसिया जाने नेपाली संख्या पनि निकै कम रहेको छ । गत आर्थिक वर्षमा रोजगारीका लागि मलेसिया जाने नेपालीको संख्या जम्मा १ हजार १ सय ३५ जना रहेको विभागले जनाएको छ । अघिल्लो आर्थिक वर्षमा भने यो संख्या ५९ हजार ७ सय १४ जना रहेको थियो । आर्थिक वर्ष ०७५/७६ मा मलेसिया जाने नेपालीको संख्या ४२ हजार १ स्य ४६ जना रहेको थियो ।
यसैबीच, गत आर्थिक वर्षमा युएई जाने नेपालीको संख्या ४० हजार ४ सय ५६ जना रहेको छ । यो संख्या अघिल्लो आर्थिक वर्षको भन्दा आधाले कमी भएको छ । अघिल्लो आर्थिक वर्ष युएई जाने नेपालीको संख्या ९३ हजार ४ सय २२ जना रहेको विभागको तथ्यांकले देखाएको छ । यो संख्या आर्थिक वर्ष ०७५/७६ मा भने १ लाख १९ हजार ८ सय ५४ जना रहेको थियो । त्यस्तै ओमान जाने नेपालीको संख्या गत वर्ष ३ हजार १ सय ३१ जना मात्रै रहेको छ । जुन अघिल्लो आर्थिक वर्षमा भने ४ हजार १ सय ३९ जना रहेको थियो । आर्थिक वर्ष ०७५/७६ मा भने ओमान जाने नेपालीको संख्या ५ हजार ४ सय ३७ जना रहेको थियो ।
वैदेशिक रोजगारको सिलसिलामा गत आर्थिक वर्षमा नेपालबाट १ हजार १३ जना कुवेत गएको तथ्यांक छ । जुन अघिल्लो वर्ष १६ हजार ८ सय ६२ जना रहेको थियो । आर्थिक वर्ष ०७५/७६ मा भने कुवेत जाने नेपालीको संख्या २५ हजार ९ सय ९५ जना रहेको विभागको तथ्यांकले देखाएको छ । अघिल्लो वर्ष ६ हजार २ सय ८९ जना गएको बहराइनमा भने गत आर्थिक वर्षमा ४ हजार ९ सय ३९ जना श्रमिक गएका छन् । आर्थिक वर्ष ०७५/७६ मा ८ हजार ६ सय ७४ जना नेपाली श्रमिक बहराइन पुगेका थिए । यो बाहेक अन्य मुलुकमा रोजगारीका लागि जाने नेपालीको संख्या अघिल्लो आर्थिक वर्षमा २३ हजार २ सय ५७ जना रहेको थियो भने गत आर्थिक वर्षमा भने यो संख्या १४ हजार १ सय ८१ जना रहेको छ । यो संख्या आर्थिक वर्ष ०७५/७६ मा २६ हजार ५ सय ९५ जना रहेको थियो । वैदेशिक रोजगारीमा जाने श्रमिकको संख्यामा कमी आएको भए पनि रेमिट्यान्स भने नघटेको राष्ट्र बैंकले केही दिनअघि सार्वजनिक गरेको तथ्यांकले देखाएको छ ।
-1745656903.jpeg)