काठमाडौं– गैरआवासीय नेपाली संघ (एनआरएनए)को १०औँ सम्मेलन तथा साधारण सभा आगामी कात्तिक महिनामा हुने भएको छ । संघको शनिबार सम्पन्न ७८औँ अन्तर्राष्ट्रिय समन्वय परिषद्को बैठकले ग्लोबल सम्मेलन तथा साधारण सभा आगामी कात्तिक ६ देखि ८ अर्थात २३ अक्टोबरदेखि २५ अक्टोबरसम्म गर्ने निर्णय गरेको हो । ग्लोबल सम्मेलन तथा साधारण सभाका लागि अध्यक्ष कुमार पन्तको संयोजकत्वमा आयोजक समितिसमेत गठन गरिएको एनआएनएले जनाएको छ । भर्चुअल माध्यमबाट सम्पन्न बैठकले आगामी निर्वाचन अनलाइनमार्फत गर्ने निर्णयसमेत गरेको छ ।
अन्तर्राष्ट्रिय कार्यकारी सचिवालयका पदाधिकारीहरूको निर्वाचन अनलाइन प्रणालीबाट गर्ने संघले जनाएको छ । सम्मेलन सम्पन्न गर्न संघका अध्यक्ष पन्तको संयोजकत्वमा आयोजक समिति गठन गरिने संघका प्रवक्ता डिबी क्षत्रीद्वारा जारी विज्ञप्तिमा जनाइएको छ ।
यसैगरी, निर्वाचनमा भाग लिने प्रतिनिधिको शुल्क नलाग्ने निर्णय गरिएको एनआएनएले जनाएको छ । यसअघि संघको सम्मेलनमा प्रतिनिधि बन्नका लागि २ सय डलर शुल्क लिँदै आएको थियो । सैयौँ प्रतिनिधिहरूको शुल्कसहित विमान टिकटको खर्च पनि अन्तर्राष्ट्रिय कार्यकारी सचिवालयका पदाधिकारी बन्ने होडमा रहने उम्मेदवारहरूले नै व्यहोर्दै आएको भन्दै शुल्कको विषयमा चर्को आलोचना हुँदै आएको थियो ।
यस्तै बैठकले निर्वाचनका लागि उम्मेदवार मनोनयन शुल्क सन् २०१९ को निर्वाचनमा तोकिएबमोजिमकै कायम गर्ने निर्णय गरेको छ । जसअनुसार अध्यक्षका लागि १० लाख रूपैयाँ, उपाध्यक्षहरू तथा महासचिवका लागि ६ लाख रूपैयाँ, सचिव तथा कोषाध्यक्षका लागि ५ लाख, सह–कोषाध्यक्षका लागि ४ लाख रूपैयाँ शुल्क लाग्ने छ । त्यस्तै महिला तथा युवा संयोजकका लागि तीन लाख ५० हजार, क्षेत्रीय संयोजकका लागि तीन लाख ५० हजार, क्षेत्रीय उप–संयोजकका लागि २ लाख ५० हजार, क्षेत्रीय महिला तथा युवा संयोजक २ लाख ५० हजार र आईसीसी सदस्यहरूका लागि १ लाख रूपैयाँ उम्मेदवार मनोनयन दर्ता शुल्क तोकिएको छ ।
बैठकले एनआएनएको निर्वाचनसम्बन्धी नियमावली, एनआरएन फाउन्डेसन, आर्थिक नियमावलीलगायत विभिन्न १९ नियमावली संशोधन गर्नुका साथै आर्थिक वर्ष २०७८÷७९ को बजेटसमेत पारित गरेको जनाइएको छ ।
