काठमाडौं– राष्ट्रिय मानव अधिकार आयोगले वैदेशिक रोजगारमा जाने नेपालीलाई कोरोनाविरुद्धको खोपको व्यवस्था मिलाउन सरकारलाई आग्रह गरेको छ । आयोगले शुक्रबार विज्ञप्ति जारी गर्दै कोरोना विरुद्धको खोपका नपाएका कारण वैदेशिक रोजगारमा जाने श्रमिकहरू समस्यामा परेको भन्दै खोप लगाउने व्यावस्था गर्न आग्रह गरेको हो ।
आयोगले श्रमिकलाई एकपटक मात्र लगाए हुने र गन्तव्य देशले मान्यता दिएको खोपका व्यवस्था गर्न सरकालाई आग्रह गरेको छ । यसका साथै आयोगले महामारीको बेलामा रोजगारका लागि जाने नेपाली श्रमिकको मानवअधिकारको रक्षा गर्न पनि सरकारलाई सरकारलाई आग्रह गरेको हो । महामारीको समयमा रोजगारीका लागि विदेश जाने नेपालीलाई पर्न सक्ने कठिनाइ न्यूनीकरणका लागि आवश्यक सहजीकरण गर्न पनि आयोगले सरकारलाई भनेको छ ।
पछिल्लो समय नेपाली श्रमिकको मुख्य गन्तव्य मुलुक कतार, साउदी अरब, कुवेतलगायत श्रम गन्तव्य देशहरूको कोरोना महामारी नियन्त्रणका लागि आफ्नो देश प्रवेश गर्नेहरूलाई खोप अनिवार्य गरिसकेका छन् । खोप नलगाई आउनेले क्वारेन्टाइनमा बस्नु पर्ने, पिसिआर परीक्षण गर्नुपर्ने र त्यसको खर्च पनि आफै“ले व्यहोर्नु पर्नेजस्ता नियम बनाएका छन् । जसले नेपाली श्रमिकलाई थप आर्थिक भार पर्ने देखिन्छ । यदि गन्तव्य मुलुकले मान्यता दिएको खोप लगाएको खण्डमा समय र आर्थिक रूपमा पनि श्रमिकलाई राहत मिल्ने वैदेशिक रोजगार व्यावसायीहरूले विश्वास लिएका छन् ।
आयोगले पनि श्रम गन्तव्य देशहरूले ल्याएका यस्ता नियमले वैदेशिक रोजगारीमा जाने नेपाली श्रमिकलाई आर्थिक व्ययभार बढ्ने देखिएकाले मान्यता पाएका खोप लगाउने वातावरण बनाउन सरकारलाई आग्रह गरेको छ । वैदेशिक रोजगारीमा जाने नेपाली श्रमिकलाई कोरोना विरुद्धको खोप तत्काल व्यवस्थापन गर्न कोभिड–१९ संकट व्यवस्थापन केन्द्रलगायत सम्बन्धित निकायलाई पत्राचार गरिसकिएको पनि आयोगले उल्लेख गरेको छ । वैदेशिक रोजगारीमा जाने श्रमिकका लागि श्रम रोजगार तथा सामाजिक सुरक्षा मन्त्रालयले सिसिएमसीलाई जोन्सन एण्ड जोन्सन खोपको व्यवास्था गर्न पत्राचार गरिसकेको छ ।
-1752335779.jpg)
