काठमाडौं– चालु आर्थिक वर्षको ११ महिनामा बिप्रेषण १२.६ प्रतिशतले वृद्धि भएको छ । विदेश जाने नेपालीको संख्यामा कमी आएको भए पनि चालू आर्थिक वर्षको जेठ मसान्तसम्म बिप्रेषण भने १२.६ प्रतिशतले वृद्धि भएर ८ खर्ब ७० अर्ब ९४ करोड पुगेको छ ।
कोरोनाका कारण विदेश जाने नेपालीको संख्यामा कमी आए पनि बिहीबार राष्ट्र बैंकले सार्वजनिक गरेको विवरणअनुसार बिप्रेषणमा वृद्धि भएको देखाएको छ । जुन अघिल्लो वर्षका सोही अवधिमा ३.२ प्रतिशतले घटेको थियो । त्यस्तै चालु आर्थिक वर्षको ११ महिनामा अमेरिकी डलर बिप्रेषणमा पनि १०.४ प्रतिशतले वृद्धि भएको राष्ट्र बैंकले जारी गरेको विवरणमा उल्लेख गरिएको छ । यो अवधिमा अमेरिकाबाट ७ अर्ब ३९ करोड बिप्रेषण भित्रिएको छ । यस्तो बिप्रेषण दर अघिल्लो बर्षको सोही अवधिमा ५.४ प्रतिशतले गिरावट आएको थियो ।
त्यसैबीच, चालु आर्थिक वर्षको ११ महिनाको अवधिमा वैदेशिक रोजगारीमा जानका लागि अन्तिम श्रम स्वीकृति (संस्थागत तथा व्यक्तिगत) नयाँ र वैधानिकीकरण) लिनेको संख्यामा निकै ठूलो मात्रामा गिरावट आएको छ । चालू आर्थिक वर्षको ११ महिनाको अवधिमा अन्तिम श्रम स्वीकृति लिनेको संख्यामा ५९.९ प्रतिशतले गिरावट आएको राष्ट्र बैंकले जारी गरेको विवरणमा उल्लेख गरिएको छ । जुन अघिल्लो आर्थिक वर्षको सोही अवधिमा १२.४ प्रतिशतले मात्रै घटेको थियो । वैदेशिक रोजगारीका लागि पुनः श्रम स्वीकृति लिनेको संख्यामा पनि कमी आएको देखिएको छ । जेठ मसान्तसम्म पुनः श्रम स्वीकृति लिनेको संख्यामा ४७.१ प्रतिशतले कमी आएको छ । अघिल्लो वर्षको सोही समयमा पुनः श्रम स्वीकृति लिनेको संख्यामा ३१.१ प्रतिशतले कमि आएको थियो ।
त्यस्तै जेठ मसान्तसम्म खुद ट्रान्सफमा भने ११.४ प्रतिशतले वृद्धि भएको राष्ट्र बैंकको तथ्यांकले देखाएको छ । अघिल्लो बर्षको सोही अवधिमा भने यो संख्यामा ३.९ प्रतिशतले कमि आएको थियो ।
