काठमाडौं– दक्षिण कोरियामा कार्यरत स्वदेशी तथा विदेशी श्रमिकको पारिश्रमिकमा ५ प्रतिशतले वृद्धि गरिएको छ । सोमबार बसेको ज्याला निर्धारण समितिको बैठकले श्रमिकले पाउँदै आएको तलबमा ५ प्रतिशतले वृद्धि गरेको हो ।
कोरियामा कार्यरत श्रमिकको तलबमा प्रतिघन्टा ४ सय ४० कोरियन वन वृद्धि गरिएको छ । वृद्धि गरिएको तलब कार्यान्वयनमा आएपछि कोरियामा कार्यरत श्रमिकले प्रतिघन्टा ९ हजार १ सय ६० कोरियन वन पारिश्रमिक पाउने छन् । अघिले कोरियामा काम गर्ने श्रमिकले प्रतिघन्टा ८ हजार ७ सय २० कोरियन वन तलब पाउँदै आएका छन् । वृद्धि गरिएको तलब सन् २०२२ देखि लागू हुने जनाइएको छ । यसबाट कोरियामा कार्यरत नेपाली श्रमिकहरू पनि लाभान्वित हुने छन् ।
बढेको तलबअनुसार हप्तामा ५ दिन र दैनिक ८ घन्टा मात्र काम गर्ने श्रमिकले पनि मासिक १९ लाख १४ हजार ४ सय ४० वन पारिश्रमिक पाउने छन् । जुन नेपाली रूपैयाँ करिब २ लाख बराबर हुन आउँछ । न्यूनतम ज्याला निर्धारण समितिको बैठकमा मजदुरका तर्फबाट प्रतिनिधित्व गर्नेहरूले प्रतिघन्टा १० हजार कोरियन वन बनाउनु पर्ने माग राखेका थिए । तर, व्यवसायीका प्रतिनिधिले कोरोनाको महामारीको कारण देखाउँदै पहिलेकै तबल कायम राख्नु पर्ने अडान लिएका थिए ।
कोरियाको न्यूनतम ज्याला निर्धारण समिति ९ सदस्यीय रहने व्यवस्था रहेको छ । जसमा मजदुरका प्रतिनिधि, कम्पनी व्यवसायी र सर्वसाधारणका प्रतिनिधिहरू रहने गर्दछन् ।
मजदुरका प्रतिनिधि र व्यवसायीका प्रतिनिधिबीच निष्कर्ष निस्किन नसकेपछि सर्वसाधारणबाट प्रतिनिधित्व गर्ने व्यक्तिहरूले मध्यमार्गी बाटो सुझाएको र त्यसैमा सहमति भएको जनाइएको छ । प्रतिघन्टा वृद्धि भएको रकम ४ सय ४० वनको ५.०४६ भए पनि ज्याला निर्धारण समितिले ५.१ प्रतिशत मानेको छ । न्यूनतम ज्याला निर्धारण समितिले बढेको ज्याला कोरियाको श्रम मन्त्रालयमा सिफारिस गरेपछि कानुनी रूपमा श्रम मन्त्रालयले ५ अगस्टमा ज्याला घोषणा गर्नेछ ।
